Այսօր «Հայելի» ակումբում ՀՀԿ պատգամավոր Ռուզան Մուրադյանը անդրադառնալով Րաֆֆի Հովհաննիսյանին, ասաց, որ նրա ոչ մի կոնկրետ բողոք փաստացի չէ. «Ընտրությունների գործընթացից հետո բոլորս էլ սպասում էինք, որ Րաֆֆի Հովհաննիսյանը պետք է շնորհավորի ընտրված նախագահին, որին այսօր ամբողջ աշխարհն է շնորհավորել: Այսօր ուժեղ իշխանությանը ուժեղ ընդդիմություն է պետք եւ Սերժ Սարգսյանը գնաց այդ քայլին, Րաֆֆի Հովհաննիսյանին հրավիրեց իր մոտ»:
Մուրադյանն անդրադառնալով Րաֆֆի Հովհաննիսյանի հացադուլին, ասաց, թե յուրաքանչյուր մարդ ինքն է ընտրում պայքարի իր ձեւը. «Միգուցե նա հացադուլի նստեր Սահմանադրական դատարանի վճռից հետո»,- նշեց տիկին Մուրադյանը:
«Միտինգներից հետո նստել հացադուլի`անհասկանալի էր: Կարծում եմ՝ Րաֆֆի Հովհաննիսյանը հացադուլի ընթացքում լավ կմտածի իր քայլերի մասին»,-ավելացրեց ՀՀԿ պատգամավորը, եւ անդրադարձավ նաեւ Րաֆֆի Հովհաննիսյանի «միայն իմ դիակի վրայով» արտահայտությանը:
«Ինչ է նշանակում իր կյանքը դնել վտանգի տակ եւ ժողովրդին պահել լարված վիճակում:Մենք ոչ մեկի դիակի վրայով չենք անցնի, եւ դիակներ չեն էլ լինի»:
Կարդացեք նաև
Տիկին Մուրադյանը հայտնեց, որ չի բացառվում, որ ինքն էլ այցելի պարոն Հովհաննիսյանին, բայց, ըստ նրա, չպետք է նայել, թե ով գնաց նրա մոտ, կամ ով չգնաց…
Եվա ՀԱԿՈԲՅԱՆ
