Անգլերենի դասընթաց ըստ Մյուլլերի բառարանի
Հարուստ է եւ բազմազան անգլերեն լեզուն: Մասնավորապես, common բառը, ըստ անգլերեն-ռուսերեն՝ ամենատարածված Մյուլլերի բառարանի, ունի տասնյակից ավելի նշանակություններ, որոնք, ինչպես որ դա սովորաբար լինում է, իրական իմաստն արտահայտում են մոտավոր, ոչ ճշգրիտ ձեւով: Common man-ը, ապրի նա Հայաստանում, Ղարաբաղում թե Ադրբեջանում, բնականաբար, լավ չի հասկանում, թե ինչ է նշանակում common state: Արդյոք դա ենթադրո՞ւմ է Ստեփանակերտի ենթակայությունը Բաքվին, թե՞ նրանք պետք է իրար մեջ ինչ-որ մի հատուկ պայմանագիր կնքեն: Եթե պայմանագրային տարբերակն է, ապա ինչպիսի՞. Ռուսաստանի եւ Թաթարստանի՞ նման, թե՞ Ռուսաստանի եւ Չեչնիայի նման:
Ճիշտ է, մոռացանք, որ մեր լուծումը պետք է լինի unconventional, ոչ մի տեղ չկիրառված, ոչ թե՝ common or garden: Հաշվի առնելով, որ Վարդան Օսկանյանը no common abilities ունեցող մարդ է, պետք է ենթադրել, որ նա կբացատրի /ցանկալի է՝ հայերեն/ , արդյոք կա՞ն նոր ծրագրում կետեր՝ 6 շրջանները, այդ թվում Քելբաջարը, ազատելու եւ փախստականների՝ իրենց բնակավայրերը վերադառնալու մասին: Եթե ադրբեջանցի «փախստականների» թիվը լինի, ասենք, 200 հազար, ի՞նչ են անելու Ղարաբաղի իշխանությունները: Մի բան պարզ է. չիրականացավ ընդդիմության կանխատեսումը /կամ չարախնդությո՞ւնը/ այն մասին, որ համանախագահներն իրենց առաջարկներում ոչ մի բառ չեն փոխի, եւ դա կստիպի հայկական կողմերին դրանք մերժել: Առաջարկներն իսկապես նոր են՝ թե կոնցեպտուալ առումով եւ թե կարեւոր դետալներով: Դա արդեն common knowledge է:
Այդ առաջարկներն, ըստ ամենայնի, կմերժի Ադրբեջանը: Թե որքանով է համանախագահների ծրագիրն ընդունելի մեզ համար, կարող են ասել միայն նրանք, ովքեր ծանոթ են տեքստին: Բոլոր դեպքերում, հույս կա, որ բանակցողները common sense կունենան եւ գործը չեն հասցնի ռազմական բախման, որում այսօրվա դրությամբ Ադրբեջանը կպարտվի, բայց կտուժեն բոլորը: Բացառված չէ, սակայն, որ այս ամենը խաղ է, եւ բանակցողներն ու միջնորդները պարզապես ձեւ են անում, թե ուզում են խնդիրներ լուծել: Այդ դեպքում մենք եւս մեկ ապացույց կստանանք, որ քաղաքականությունը common woman-ի գործ է:
Կարդացեք նաև
ԱՐԱՄ ԱԲՐԱՀԱՄՅԱՆ Հ. Գ. Հակիրճ բառարան՝ common man-հասարակ, շարքային մարդ common state-ընդհանուր պետություն common or garden-ընդունված, շաբլոնային no common abilities-արտառոց ընդունակություններ common knowledge-հանրահայտ բան common sense-բանականություն common woman-պոռնիկ
