Խորհրդարանական ֆոլկլորը նոր բարձունքներ է նվաճում։ Պատգամավորներն արձանագրում են, որ ԱԻՄ խմբակցությունը խորհրդարան է եկել երեք հոգով՝ Հայրիկյան Պարույր, Զեյնալվանդյան Ներսես, Զաքարյան Դուրսես (խոսքը Արամազդ Զաքարյանի մասին է, որը դուրս է մնացել «Միասնություն» դաշինքից)։ Խորհրդարանական որոշ տեսաբաններ էլ այն կարծիքին են, որ վերջապես «Միասնության» ընտրացուցակը սկսեց մաքրվել։
ՅԱՎԼԻՆՍԿԻՆ ԿԳԱ ՀԱՅԱՍՏԱՆ
Մոսկվայից վերադարձել է «Հայրենիք» պատգամավորական խմբի պատվիրակությունը՝ Էդվարդ Եգորյանի գլխավորությամբ։ Վերջինս «Առավոտին» հայտնեց, որ քննարկվել են միջկուսակցական համագործակցության պայմանագրին վերաբերող հարցեր եւ, ընդհանրապես, համագործակցության տեխնիկան։ Գրիգորի Յավլինսկին Հայաստան կայցելի մեր խորհրդարանական ընտրություններից հետո։
Կարդացեք նաև
ՕՐԱԿԱՆ 50 ՀԱԶԱՐ ԱՅՑԵԼՈՒ
Վատիկանի Սիքստինյան սրահում մինչեւ հուլիսի 16-ը շարունակվելու է Հայաստանում քրիստոնեության պետական կրոն հռչակման 1700-ամյակի առթիվ կազմակերպված Հռոմ-Հայաստան ցուցահանդեսը: Մշակույթի, երիտասարդության հարցերի եւ սպորտի նախարարությունում հայտնեցին, որ ըստ իտալական մամուլի յուրաքանչյուր օր այստեղ լինում է շուրջ 50 հազար այցելու, իսկ սբ. Զատիկի տոնին նրանց քանակը կրկնապատկվել է՝ հասնելով մոտ 100 հազարի սահմանին: Վկայակոչելով իտալական մամուլի մեկ այլ հրապարակում, նախարարությունում ասացին, որ Հռոմի պապ Հովհաննես Պողոս Երկրորդը ցուցադրված 500 նմուշներից, որպես ժամանակի բարձր քաղաքակրթության վառ ապացույց, հատկապես առանձնացրել է 3-ը:
