Մեր 8-րդ կառավարության գրեթե բոլոր անդամների պաշտոնական կենսագրությունները նույն կերպ են ավարտվում՝ ամուսնացած է եւ ունի 2 կամ 3 երեխա։ Բացառությունը Գագիկ Շահբազյանն է, որն ունի միայն մեկ զավակ, եւ Ռազմիկ Մարտիրոսյանն ու Լեոնարդ Պետրոսյանը, որոնցից յուրաքանչյուրը 4 երեխա ունի։
Պաշտոնական կենսագրության այդ ավանդական վերջին տողը միայն մի դեպքում պահպանված չէ՝ վերոհիշյալ «գրեթե»-ն վերաբերում է զուտ պաշտպանության նախարար Վաղարշակ Հարությունյանին, որը չնայած բարետես է ու նաեւ զուսպ ու կիրթ մարդու տպավորություն է թողնում, այնուամենայնիվ, կողակից չունի։ Պատճառները փորձեցինք իրենից պարզել։ Պատասխանում էր անընդհատ ծիծաղելով։
– Գուցե ինչ-որ որոշո՞ւմ կա, որ Հայաստանի պաշտպանության նախարարն անպայման պիտի ամուսնացած չլինի. Վազգեն Սարգսյանը՝ մեկ, դուք՝ երկու…
– Պետական նման որոշում չկա։
Կարդացեք նաև
– Իսկ, այնուամենայնիվ, ինչո՞ւ ամուսնացած չեք։
– Սա իմ անձնական խնդիրն է։ Գործերը շատ են՝ վերջացնենք, կամուսնանամ։
– Մամուլն արդեն ձեզ հանրապետության երկրորդ լավագույն փեսացու է անվանում։
– Չգիտեմ, չեմ լսել։ Բայց դուք ուզում եք պաշտպանության հզոր նախարա՞ր ունենալ, թե՞ մի… հզոր ընտանիք։
– Երկուսն էլ վատ չէր լինի։
– Իհարկե, բայց գոնե մի մարդու երեւի արժե թույլ տալ, որ նա առայժմ միայն պաշտպանության գործերով զբաղվի։
Ա. Ի.
