Յուրօրինակ լուծում առաջարկեց ԱԺ պատգամավոր Համլետ Հարությունյանը. «Հայաստանի բարձրաստիճան իշխանավորների ռազբորկաները լուծելու համար պետք է թույլատրել մենամարտը», այլապես՝ «իրար հանդեպ նրանց կենսաբանական ատելությունից տուժում ենք մենք բոլորս»։ Կոմունիստ Խորեն Սարգսյանը հավելեց ասվածին. «Մենամարտն ընթանում է։ Պետք է միայն օրինականացնել այն»։
ՎԱՏ ԼՈՒՐ
Փաստաբաններ Ռուբեն Ռշտունու եւ Ռուբեն Սահակյանի ասուլիսի «Հայլուրի» լուսաբանմանը հետեւած աղմուկին ի պատասխան Ազգային հեռուստատեսության գործադիր տնօրենն իրավամբ նշում էր, թե հասարակությանն անաչառ տեղեկատվություն մատուցելն իրենց պարտքն է։ Ահա ապրիլի 5-ին «Հայլուրը» հաղորդեց ռեպորտաժ մեկ այլ փաստաբանի՝ Վանյա Սուքիասյանի ասուլիսից։ Հեգնական մեկնաբանությունները հաջորդում էին մեկը մյուսին, անաչառ տեղեկատվություն մատուցելու պարտականության մասին իսպառ մոռացվել էր… Կարելի էր այս առիթով խոսել կրկնակի չափանիշների, քաղաքական պատվերի նպատակահարմարության եւ այլ հարցերի շուրջ, բայց սահմանափակվենք միայն գործընկերներին ուղղված այս առաջարկով՝ եթե մինչեւ դատավճիռն ունակ եք հստակ որոշել, թե ով է անմեղ, իսկ ով՝ մեղավոր, ապա ափսոս է, որ ձեր այդ ունակությունները վատնում եք լրատվությամբ սքողված քարոզչության վրա։ Անցեք աշխատանքի իրավապահ մարմիններ։
