Սեպտեմբերի 5-ի «Վլաստ» ամսագրում տպագրվել է հարցազրույց Հեյդար Ալիեւի հետ, որը կոչվում է՝ «Ես եւս 8 տարի կլինեմ Ադրբեջանի նախագահ»։ Պատմելով Քոչարյանի հետ իր հանդիպումների մասին, Ադրբեջանի նախագահն այնուհետեւ սահուն անցում է կատարում իրեն հետաքրքրող թեմային՝ նշելով, թե Հայաստանից վտարված 300 հազար ադրբեջանցիները պետք է հետ վերադառնան։ Արդյո՞ք նման խոսակցությունները նա վարում է Հայաստանի նախագահի հետ, իրենց պարբերական հանդիպումների ժամանակ, մնում է հարցականի տակ։
ԴԻՄԱՑԻ՛Ր, ԲՈՒՇ՝ ՎԱՐՉԱՊԵՏ ԿԴԱՌՆԱՍ
ԱՄՆ նախագահի պաշտոնին հավակնող Ջորջ Բուշ կրտսերը տառապում է լուրջ մտավոր արատով։ Այդ մասին է գրել «Vanity Fair» ամսագրում լրագրող Գեյլ Շիհին։ Ըստ հեղինակի՝ Բուշը տառապում է դիսլեքսիայով՝ ուղեղի բնածին հիվանդությամբ, որը դժվարացնում է խոսքը՝ բանավոր եւ գրավոր, թույլ չտալով նրան ճիշտ կառուցել մտքերը։ Ոչինչ, Գեւորգ, եթե Ամերիկայում չհաջողես, կդառնաս Հայաստանի վարչապետ։ Մեզանում նման արատները նույնիսկ ցանկալի են։
Կարդացեք նաև
ԿՈՄԱՆԴՈՍԻ ՇՈՒՐՋ
Ըստ «Առավոտին» հասած տեղեկությունների, «Կոմանդոս» հասարակական կազմակերպությունում Ա. Տեր-Թադեւոսյանի շուրջ միավորվում են մեծ թվով ազատամարտիկներ։ Կազմակերպության խորհրդի կազմի մեջ են մտել գրող-հրապարակախոս Զորի Բալայանը, Շուշիի զորամիավորման հրամանատար Ժիրայր Սեֆիլյանը, հայտնի բուժքույր Աիդա Սերոբյանը, ճանաչված դեղագործ Հարություն Կարապողոսյանը, Արցախի հայտնի քաղաքական գործիչ Լեւոն Մելիք-Շահնազարյանը եւ ուրիշներ։
