Որկրամոլությո՞ւն, թե՞ բովանդակություն Այսօր հանրապետության 48 հազար շրջանավարտներ տոնում են իրենց «Վերջին զանգը» Մայրաքաղաքի մի քանի դպրոցներ այդ հարցում շտապողականություն են ցուցաբերել եւ դեռ անցյալ շաբաթ ավարտել բոլոր կարգի միջոցառումները: Այս անհամաձայնությունն առաջ եկավ, երբ ուսումնական տարվա ավարտին ԿԳ նախարարը ներքին կարգով տնօրեններին հրահանգեց տուրք չտալ ձեւին եւ դպրոցական ավարտական միջոցառումներն անցկացնելիս հավատարիմ մնալ օրվա խորհրդին: Երեկ էլ այս առթիվ մեր հարցին ի պատասխան, ԿԳ նախարարն ասաց. «Միջոցառումներն անցկացվում են այնպես, ինչպես դպրոցները ցանկանում են: Որեւէ սահմանափակում որեւէ դպրոցի համար՝ չի արվել: Ես ասել եմ, որ պետք է լինեն բովանդակություն արտահայտող միջոցառումներ»: Ասվածը՝ յուրաքանչյուր տնօրեն, ինչպես այս օրերին համոզվեցինք, հասկացել է յուրովի: «Վերջին զանգի» ավանդական մեծ միջոցառումների կազմակերպման հարցում որոշակի սահմանափակումներ մտան. առաջ եկավ նոր տերմին՝ «Վերջին դաս», որ կազմակերպվում է դասարաններում, սահմանափակվում կարճ ելույթներով եւ տասներորդցիների դժգոհության առիթ է դարձել: Որոշ տնօրեններ պարզապես արգելել են երեխաներին բեմ բարձրանալ: Գուցե նրանց համար դա լոկ ձե՞ւ է, իսկ ամենահեղինակավոր ռեստորանում քեֆ անելը՝ բովանդակությո՞ւն: Խմբագրություն եկած բազմաթիվ ահազանգերը վկայում են, որ ռեստորանների եւ տնօրեններին ու ուսուցիչներին տրվելիք նվերների համար հավաքված գումարը հասնում է մինչեւ 50 հազարի դրամի՝ կապված այն հանգամանքից, թե դպրոցը ծայրամասային է, թե, այսպես կոչված, «էլիտար», կամ՝ կապված տնօրենի բարեխղճության հետ: Փորձը ցույց է տալիս, որ, օրինակ, կենտրոնում գտնվող դպրոցներում թե՛ աշակերտների, թե՛ ուսուցիչների պահանջներն ավելի մեծ են: Որոշ դպրոցներ էլ «Վերջին զանգի» շնորհիվ առաջ են տանում իրենց սեփական բիզնեսը: Օրինակ, թիվ 22 դպրոցի տնօրենն առաջարկել է ավարտական երեկոն անցկացնել իր՝ Դավիթաշենում գտնվող «օբյեկտում»: Թիվ 137-ը, ինչպես եւ նախորդը, բոլոր ծախսերը գնահատել է 50 հազար դրամ, որից միայն 20 դոլարը հատկացնելու է «Մայամի» ռեստորանում յուրաքանչյուր անձին: Ի դեպ, նշված գումարի մեջ մտնում է նաեւ քննությունների ժամանակ ուսուցիչներին կերակրելը: Թիվ 27 դպրոցն այսօր, ավանդույթի համաձայն, «Վերջին զանգի» միջոցառումից հետո (որին, ի դեպ, Թաթայի հայտնի երգով հանդես են գալու նաեւ դպրոցի 60 ուսուցիչներն ու տնօրենը) եկեղեցում կկնքի նաեւ իր չկնքված շրջանավարտներին: Հ. ԲՈՒԴԱՂՅԱՆՀ. Գ. Երեկ հանրապետության 24 շրջանավարտներ՝ ընտրված մարզային կրթության վարչությունների կողմից, ԿԳ նախարարի հրամանով ստացան շնորհակալագրեր՝ ուսման բարձր առաջադիմության եւ օրինակելի վարքի համար: Շնորհակալագրերը հանձնեց անձամբ նախարարը: Այս 24 հոգու շրջանում նախարարի անցկացրած հարցումից պարզվեց, որ այս տարի հեղինակավոր է «Թարգմանչական գործ» մասնագիտությունը: Բուհական մասնագիտություններին հատկացված տեղերի մասին՝ վաղվա համարում:
