![\"\"](\"https://www.aravot.am/2011/aravot_arm/April/29/p19.jpg\")
Պաղեստինի ազգային վարչակազմի ղեկավար Մահմուդ Աբբասի գլխավորած ՖԱՏԽ կուսակցության ու ՀԱՄԱՍ շարժման առաջնորդները վերջ են դրել իրենց միջեւ վաղեմի թշնամությանն ու համաձայնագիր են ստորագրել անցումային կառավարություն ձեւավորելու մասին, որը գործելու է մինչեւ ընտրությունները:
Reuters-ի փոխանցմամբ, Պաղեստինի հետ պերմանենտ հակամարտության մեջ գտնվող Իսրայելը կասկած է հայտնել, թե այդ պայմանագիրը, որը գաղտնի կերպով ստորագրվել է Եգիպտոսում, Մերձավոր Արեւելքում խաղաղություն կհաստատի, եւ Աբբասին կոչ է արել այսուհետ եւս հեռու մնալ 2007 թ. քաղաքացիական պատերազմից ի վեր Գազայի հատվածում վերահսկողություն սահմանած մահմեդական ՀԱՄԱՍ շարժումից: Պաղեստինի ժողովրդի միասնությանը հասնելը համարվում է անկախ Պաղեստինի ձեւավորման առանցքային նախապայմաններից մեկը, սակայն Արեւմուտքը միշտ էլ հրաժարվել է գործ ունենալ ՀԱՄԱՍ ծայրահեղական շարժման հետ՝ վերջինիս կողմից Իսրայելը ճանաչելու եւ ուժի կրառումը դադարեցնել չցանկանալու պատճառով: «Մենք համաձայնել ենք կառավարություն ձեւավորել, որում կներգրավվեն անկախ գործիչներ եւ որոնք կնախաձեռնեն նախագահական եւ խորհրդարանական ընտրությունների նախապատրաստությունը»,- Կահիրեում հայտարարել է ՖԱՏԽ-ի կողմից բանակցող պատվիրակության ղեկավար Ազզամ ալ-Ահմադը (աջից)՝ հավելելով, որ բանակցությունները տեղի են ունենում արդեն ութ ամիս, իսկ ձեռք բերված համաձայնության դրույթների իրականացմանը հետեւելու է Արաբական պետությունների լիգան: «Պաղեստինի ինքնավարությունը պետք է ընտրի Իսրայելի կամ ՀԱՄԱՍ-ի միջեւ խաղաղությունը: Երկուսի հետ խաղաղություն կնքելն անհնարին է»,- հայտարարել է Իսրայելի վարչապետ Բինիամին Նեթանյահուն:
