2003 թվականից հոկտեմբերի 22-23-ին նշվում է «Գյումրու օրը»: Այս տարի կար նորամուծություն: Ըստ Շիրակի մարզպետարանի, Հովհաննես Շարամբելյանի անվան ժողովրդական ստեղծագործության կենտրոնն առաջին անգամ կազմակերպել էր դարբնությանը նվիրված գիտագործնական համաժողով: Հավաքի նպատակն էր անցկացնել վարպետության դասեր հանրապետության ճանաչված դարբինների մասնակցությամբ: Համաժողովը անցկացվեց Գյումրիում եւ քաղաքի սահմաններից դուրս մեծ ճանաչում ունեցող դարբիններ Գագիկ եւ Վարդան Մարտիրոսյանների «Եռանկյունի» դարբնոցում, որտեղ եղբայրներն առաջիկայում ցանկանում են հիմնել դարբնության դպրոց:
Դարբնի մասնագիտության հետ կապված ավանդույթներն ու պատմությունները շատ են:
Սողոմոն իմաստունը թույլատրել է ամենաբարձր տեղում նստել միայն դարբիններին:
Կարդացեք նաև
Մեկ այլ տեղեկատվության համաձայն, զնդանը դրվում է կայծակից շանթահարված ծառի կոճղի վրա, խորհրդանշելով նախ դարբնի հուժկու հարվածները կոճղի տակ գտնվող վիշապի գլխին, ապա այն, որ եթե այդ ծառը դիմացել է կայծակին, կդիմանա նաեւ դարբնի հարվածներին:
Ըստ այլ խոսքուզրույցի, դարբնի տաշտի ջուրը ունի սուրբ նշանակություն: Վիշապին ոչնչացնելու համար դարբինը կարմրած երկաթը ծեծելուց հետո մտցնում է ջրի մեջ եւ ջուրը ստանում է բուժիչ հատկություն: Ծննդկան կամ հիվանդ ունեցող ընտանիքները դարբնից տարել են այդ ջրից, խմեցրել հիվանդին եւ վիշապին հանել մարդու միջից:
Արամ ԶԱՔԱՐՅԱՆ
