Քաղաքական գործիչները շարունակում են քննարկել նախկին արտգործնախարար Վարդան Օսկանյանի՝ ԲՀԿ-ին անդամագրվելու մասին լուրը: ՀՀԿ-ական Մենուա Հարությունյանն այսօր Aravot.am-ի հետ զրույցում ասաց, որ Օսկանյանն ինքն է որոշել իր քաղաքական ապագան ու դրանից ողբերգություն սարքել պետք չէ.«Օսկանյանը «Բարգավաճ Հայաստան» կուսակցությունը չի դարձնելու ավելի քաղաքականացված կամ ավելի զորեղ, որովհետեւ «Բարգավաճ Հայաստանն» իր համակիրների, ընտրողների սիմպատիայի վրա հիմնված քաղաքական ուժ է: Բայց կարծում եմ, որ Վարդան Օսկանյանի կերպարի քաղաքական դեմքերն իրոք պետք է լինեն քաղաքականության մեջ, որովհետեւ քաղաքականության մեջ հենց նրանք պետք է լինեն եւ ոչ թե թաղային հեղինակությունները, կրիմինալ ներկայացուցիչները: Նման մարդկանց մուտքը քաղաքականություն ժամանակի ընթացքում կստիպի, որ այն մարդիկ, որոնք քաղաքականության հետ որեւէ կապ չունեն՝ դուրս գան քաղաքականությունից»:
Մեր հարցին ի պատասխան, թե Օսկանյանի մուտքը կստիպի՞ կամ կնպաստի՞ ՀՀ 2-րդ նախագահ Ռոբերտ Քոչարյանի քաղաքականություն վերադառնալուն, պարոն Հարությունյանը կարծիք հայտնեց, որ նա չի վերադառնա քաղաքականություն:
Արփինե ՍԻՄՈՆՅԱՆ
