«Հեռուստատեսությամբ ամբողջ օրը ռեկլամի նման գնում է` 1000-2000 դրամանոց ակնոց բաժանեցին, մուրաբաներ: Երեկ լսել եմ, որ Զատիկին ընդառաջ՝ ձվեր են բաժանել: Դա պարզ է մեզ համար, որ բարեգործության հետ աղերս չունեցող երեւույթներ են եւ շատ տհաճ է»,- այսօր Aravot.am-ի հետ զրույցում նշեց «Ժառանգության» պատգամավոր Արմեն Մարտիրոսյանը: Ըստ նրա, նման բարեգործություններ անում են կոալիցիոն բոլոր կուսակցությունները` խախտելով օրենքը: Մեր դիտարկմանը, որ իրենք ասում են` մենք միշտ ենք բարեգործություններ արել, ուղղակի այս շրջանում համընկնում է ընտրությունների հետ` խոսում են, պարոն Մարտիրոսյանը պատասխանեց. «Ուրեմն թող լուծարվեն, թող բարեգործական կազմակերպություն լինեն, որքան ուզում են` բարեգործություն թող անեն: Մենք էլ իրենց շնորհակալություն կհայտնեինք, երկրի նախագահին ես նույնիսկ կոչ կանեի իրենց մեդալներ տալ: Բայց մենք բոլորս էլ երկրային անձինք ենք եւ շատ պարզ է մեզ համար, թե դա ինչի համար է»:
Մեր հարցին ի պատասխան` «Ժառանգությունը» չի՞ անում բարեգործություն առհասարակ` պարոն Մարտիրոսյանը վստահեցրեց, որ ոչ. «Մենք չենք անում, որովհետեւ կուսակցությունը բարեգործական կազմակերպություն չէ, քաղաքական մարմին է, որը մի գործառույթ իրականացնելու իրավունք ունի` դա քաղաքական գործունեությունն է: «Ժառանգության» անհատները բարեգործություններ անում են, բայց դուք երբեւիցե դրա մասին չեք լսել ու չեք լսելու, որովհետեւ Ավետարանն ինչպես ասում է` աջ ձեռքդ չպետք է իմանա ձախն ինչ է անում: Այդպես ենք մենք բարեգործություն անում»:
Հռիփսիմե ՋԵԲԵՋՅԱՆ
Կարդացեք նաև
