Մայրաքաղաքի Շենգավիթ վարչական տարածքում նախագահ Սերժ Սարգսյանի նախընտրական հանդիպմանը ներկա էր նաեւ «Ազգային միաբանություն» կուսակցության անդամ, պատգամավոր Արա Սիմոնյանը: Հիշեցնենք, որ վերջինս պատգամավոր ընտրվեց թիվ 10 ընտրատարածքից, այն բանից հետո, երբ 2008 թվականի մարտի 1-ի իրադարձություններից հետո հայտնի գործարար Խաչատուր Սուքիասյանի ձեռքից «խլեցին» մանդատը: Արա Սիմոնյանի մրցակիցն էր նույն իրադարձությունների արդյունքում կալանավայրում հայտնված համաժողովրդական շարժման ակտիվիստ Նիկոլ Փաշինյանը:
Aravot.am-ը Արա Սիմոնյանից հետաքրքրվեց, թե ինչո՞ւ այս անգամ չառաջադրվեց մեծամասնական ընտրակարգով, նույն ընտրատարածքում: Հավելենք, որ այժմ այդ տարածքում ընտրապայքար են մտել հայտնի գործարարներ Սարիբեկ Սուքիասյանը եւ Գարեգին Նուշիկյանը: «Նպատակահարմար չէր»,- ասաց Սիմոնյանը: Մեր հաջորդ հարցին՝ այն ժամանակ Ձեր մրցակցի դիրքերը թույլ էին, Նիկոլը բանտում էր, հիմա ուժեղ մրցակիցներ են, այդ պատճառո՞վ նպատակահարմար չէր, մեր զրուցակիցը պատասխանեց. «Ես ոչ ոքի հետ չեմ մրցակցել: Ես առաջադրել եմ իմ թեկնածությունը, ներկայացրել եմ իմ ծրագրերը, ժողովուրդը տվել է իր ձայնը եւ ես հաղթել եմ: Ես երբեք չեմ համարել, որ դա մրցակցություն է: Սա վազք չի, որ ով ուժեղ վազի՝ նա էլ հաղթի»:
Նախագահի հանդիպումներին ներկա գտնվելով Սիմոնյանն իր երախտագիտությո՞ւնն է հայտնում ԱՄ նախագահին ՀՀԿ ցուցակում ընդգրկելու համար՝ մեր այս դիտարկմանն էլ Արա Սիմոնյանը հակադարձեց. «Երախտագիտության հարց չկա, այդպես չի կարելի հարցին մոտենալ, մեր նախագահն է ելույթ ունենում, մենք հավատում ենք նրան, վստահում եւ սատարում»:
Նելլի ԳՐԻԳՈՐՅԱՆ
