Այսօր պարզ դարձավ, որ ԿԸՀ ինքնաբացարկի դիմում են ներկայացրել մի շարք քաղաքական գործիչներ, այդ թվում՝ նաև ՀԱԿ առաջնորդ, ՀՀ առաջին նախագահ Լևոն Տեր-Պետրոսյանը, ՕԵԿ առաջնորդ Արթուր Բաղդասարյանը: Ուստի Aravot.am-ը «Համագործակցություն հանուն ժողովրդավարության» կենտրոնի նախագահ Ստեփան Դանիելյանին խնդրեց մեկնաբանել՝ արդյոք սա նշանակո՞ւմ է Հանրապետական կուսակցության բացարձակ հաղթանակ, կամ պայքարից հրաժարվելու ձև: Մեր զրուցակիցը պատասխանեց. «Ինձ համար, որպես քաղաքացի, բացարձակ հետաքրքիր չէ՝ նրանք վայր կդնե՞ն մանդատները, թե՞ ոչ: Այսպես թե այնպես՝ ընդդիմություն կոչվող քաղաքական ուժերն այս խորհրդարանում անելիք չունեն:
Ինչ վերաբերում է նրան, որ իշխանական պատգամավորի թեկնածուներն են մանդատները վայր դնում, ապա դրա մի բացատրությունն այն է, որ նրանց կառավարությունում կամ գործադիր մարմնում առաջարկ է եղել: Մյուս կողմից էլ՝ նրանց նախապես դիմում են ստորագրել տալիս, թե հրաժարվել են պատգամավորի մանդատից ու շատերին առանց հարցնելու այդ դիմումները ներկայացնում են»:
Քաղաքագետն այս երևույթին տալիս է հետևյալ մեկնաբանությունը. «Սա նշանակում է, որ ոչ միայն հասարակությունն է ճորտացված, այլ այն պատգամավորները, որոնց ճակատագիրը կախված է մեկ թղթից: Եվ անազատ է ոչ միայն հասարակությունը, այլև խորհրդարանը»:
Կարդացեք նաև
Ս. Դանիելյանը, որպես լուծման ճանապարհ, տեսնում է այս քաղաքական դաշտը մի կողմ դնելն ու նորը ստեղծելը և արդեն օգտագործված քաղաքական ուժերի վրա հույս չդնելը:
Տաթև ՀԱՐՈՒԹՅՈՒՆՅԱՆ
