«Բանակում մթնոլորտը շատ անբարոյական է: Այն փողոցի, բանտերի մթնոլորտը, որը մենք չենք սիրում, տեղափոխվել է բանակ»,- Գերագույն խորհրդի արտաքին հարցերի հանձնաժողովի նախկին նախագահ Հովհաննես Իգիթյանն Aravot.am-ի հետ զրույցում այսպես ներկայացրեց իրավիճակը՝ Հայոց բանակում:
Ըստ նրա, ներքին խնդիրներ կան, առաջինն այդ մթնոլորտն է. «Երկրորդ խնդիրը ոչ կոմպետենտությունն է՝ հիմնականում սպայական կազմի եւ երրորդ խնդիրը՝ կոռուպցիան է: Կոռուպցիան ճնշում է, ուտում է բանակը՝ ներսից: Դա պարզ երեւոմ է: Նայեք ինչ մեքենաներ, ինչ տներ, ինչ ունեցվածքներ ունի հրամայական կազմը: Նաեւ կա մի հանգամանք՝ բանակին շատ հաճախ օգտագործում են քաղաքական նպատակների համար, հիմնականում՝ ընտրությունների ժամանակ: Եվ այն մարդիկ, որոնք իրականացնում են այդ քաղաքական պատվերը բանակում, նրանք դառնում են ավելի լկտի, ավելի անխոցելի եւ նրանք շարունակում են իրենց հղփացումը, հարստացումը եւ բանակը դառնում է ընդհանրապես անվերահսկելի ոչ միայն հասարակության կողմից, այլ նաեւ՝ նույն իշխանության կողմից: Որովհետեւ եթե դու բանակին քաշում ես անօրինականության մեջ, նրանք դառնում են համահանցակից»:
Հռիփսիմե ՋԵԲԵՋՅԱՆ
