դատախազ Ալեքսան Մուրադյան
ՀՀ քրեական գործերով վերաքննիչ դատարանը, դատավոր Եվա Դարբինյանի նախագահությամբ այսօր լսեց ցմահ ազատազրկման դատապարտված Մհեր Ենոքյանին եւ նրա պաշտպան, ՀՀ փաստաբանների պալատի անդամ Ռոբերտ Ռեւազյանի վերաքննիչ բողոքները:
Դատավորը տեղեկացրեց, որ ցմահ դատապարտյալից ստացվել է դիմում՝ իր մասնակցությունն ապահովելու հետ կապված, դատարանն այդ կապակցությամբ ուղարկել է ծանուցագիր: Այնուհանդերձ, ցմահ ազատազրկվածը չէր ներկայացել դատարան:
Մինչ կողմերին լսելը, դատավորը հրապարակեց վերաքննիչ բողոքների բովանդակությունը, դատախազ Ալեքսան Մուրադյանի առարկությունները: Ցմահ ազատազրկվածի պաշտպան Ռոբերտ Ռեւազյանը գտնում էր, որ 2003թ. ՀՀ նախագահ Ռոբերտ Քոչարյանը իր 103-Ա հրամանով նոր պատժատեսակ էր սահմանել, որը գործող քրեական օրենսգրքով ոչ միայն գոյություն չուներ եւ նաեւ ավելի խիստ էր: Խոսքը մահապատիժը ներման հրամանագրով փոխարինելու, ապա ցմահ ազատազրկման դատապարտելու մասին է: Բողոքաբեր կողմը պահանջում էր անվավեր ճանաչել նախագահի այդ հրամանագիրը եւ նշանակված պատիժը՝ ցմահ ազատազրկումը փոխարինել մինչեւ 20 տարի ազատազրկմամբ:
դատավոր Եվա Դարբինյան
Ցմահ դատապարտված Մհեր Ենոքյանը իր բողոքում գրել էր, որ ինքը իրավաբան չէ եւ բոլոր իրավական հիմնավորումները կներկայացնեն իր փաստաբանները: Նաեւ գրել էր, որ չի կատարել այն հանցանքը, որում իրեն մեղադրել են, իսկ այդ պատժատեսակը իր վիճակն ավելի ծանրացրել է: Ըստ Ենոքյանի, ՀՀ նախագահն իրավունք չունի արդարադատություն իրականացնել, քանի որ արդարադատություն իրականացնում են, Սահմանադրության համաձայն, դատարանները, արդարադատության մարմինները:
Կարդացեք նաև
Դատախազ Ալեքսան Մուրադյանը ասաց, որ նախագահի վերոնշյալ հրամանագրով ներում է շնորհվել 42 անձի նկատմամբ եւ որ նախագահն ըստ էության ուներ Սահմանադրությամբ օժտված ներում շնորհելու իրավասություն: Նա բերեց ցմահ ազատազրկման դատապարտված Մանուկ Սեմերջյանի օրինակը, ասելով, որ փոխվել է նրա ռեժիմը, անցել է կիսափակ ռեժիմի: Ավելին՝ ակնարկեց, թե Ենոքյանի բողոքը այս դատարանում քննարկվելիք փաստ չէ, այլ՝ Սահմանադրական դատարանի: Նա նաեւ բերեց Բելառուսի մարդու իրավունքների պաշտպանի դիմումներից մեկի օրինակը՝ մահապատիժը փոխարինել ցմահ ազատազրկմամբ: Խոսքը մարտին մետրոյի պայթեցնողների մասին էր…
Aravot.am-ի հարցին, թե ինչպե՞ս կարող է մարդը չօգտվել դատական պաշտպանության իր իրավունքից, այն դեպքում, երբ առաջին ատյանում լսվել է այդ հարցը եւ դիմել Սահմանադրական դատարան, դատախազն ասաց, որ քանի որ հղում արվեց Սահմանադրությանը եւ որ խնդրահարույց է արդարադատություն իրականացնելու հարցը, ապա ինքը դարձյալ պնդում է, որ այդ վեճը ենթակա է Սահմանադրական դատարանում լուծվելու:
Դատավոր Եվա Դարբինյանը դուրս գալով խորհրդակցական սենյակից՝ մերժեց Մհեր Ենոքյանի բողոքը:
Ռուզան ՄԻՆԱՍՅԱՆ
