Սա այն տունն է, որտեղ տեղի է ունեցել պայթյունը
Վիրավոր Բորիս Պետրոսյանը` անգիտակից վիճակում, հիվանդանցում:
Հունիսի 27-ի առավոտյան Տավուշի մարզի Նավուր գյուղի բնակիչ, 1959թ. ծնված Վալենտին Սարգսյանը գնացել է աներոջ տուն եւ պայթեցրել նռնակ, որի հետեւանքով ինքը, իր կինը՝ 1961թ. ծնված Լիանետա Պետրոսյանը եւ Վալենտինի աներձագի կինը՝ 1951թ. ծնված Թամարա Հարությունյանը, տեղում զոհվել են:
Վալենտին Սարգսյանի աներձագ, 1950թ. ծնված Բորիս Պետրոսյանը ժամը 14-ի սահմաններում հրազենային վերքերով տեղափոխվել է Բերդի բժշկական կենտրոն: Բորիս Պետրոսյանի հարեւան Մանյակ Ալիխանյանը մեզ հայտնեց, որ ինքը պայթյունից հետո ծխով եւ ապակու կտորներով լցված տանը տեսել է անշնչացած Լիանետա Պետրոսյանին եւ նրան գրկած ամուսնուն՝ Վալենտին Սարգսյանին, իսկ Թամարա Հարությունյանը որոշ ժամանակ եղել է կենդանի: Բորիս Պետրոսյանը պայթյունից հետո եղելէ գիտակից վիճակում, սակայն Բերդի բժշկական կենտրոն է տեղափոխվել է ուշակորույս:
Տունը որտեղ տեղի է ունեցել պայթյունը, մեր այցելության ժամանակ հսկվում էր Բերդի ոստիկանների կողմից, որոնք սպասում էին պայթուցիկ նյութերի փորձագետի ժամանմանը: Ժամը 18-ի դրությամբ բժշկական կենտրոնում Բորիս Պետրոսյանը դեռեւս գիտակցության չէր եկել:
Բժշկական կենտրոնի վիրաբուժական բաժանունքի վարիչ Համլետ Պետրոսյանը նրա վիճակը բնութագրեց որպես կայուն ծանր: Նավուրի բնակիչները, որոնք ցանկացան գաղտնի մնալ, «Առավոտի» թղթակցին հայտնեցին, որ դեպքից 2 օր առաջ Վալենտին Սարգսյանը ծեծել է կնոջը, որի պատճառով կինը գնացելէ հայրական տուն: Վալենտինն այնտեղ է գնացել , որպեսզի կնոջը համոզի ետ վերադառնալ: Այնտեղ Վալենտինը գլխով հարվածել կնոջը՝ Լիանետային, նաեւ սպառնացել նռնակ պայթեցնել; Իրավիճակը փորձել է փրկել Թամարա Հարությունյանը, սակայն ինքն էլ զոհվել է նռնակի պայթյունից:
Կարդացեք նաև
Համագյուղացիների վկայությամբ՝ Վալենտինը անհարկի խանդել է կնոջը: Զոհված ամուսինները երկու չափահաս որդիներ ունեին, որոնք ապրում են Ռուսաստանում: Վալենտին Սարգսյանը 1997թ. Վանաձորում դատապարտվել է թմրամոլության մեղադրանքով: Բացի այդ, խորհրդային բանակում ծառայության ժամանակ անկարգապահ լինելու պատճառով նա ուղարկվել է կարգապահական գումարտակ:
Ոսկան ՍԱՐԳՍՅԱՆ
