ԱԺ արտաքին հարաբերությունների մշտական հանձնաժողովի նախագահ Արտակ Զաքարյանն այսօր Aravot.am-ի հետ զրույցում մեկնաբանեց, թե ինչու են ադրբեջանցի հաքերներն անընդհատ հարձակում գործում հայկական կայքերի վրա, ջարդում դրանք: Նրա խոսքերով՝ «Տեղեկատվական պատերազմն անընդհատ է, եւ հաքերների հարձակումներն այդ պատերազմի մի մասն են: Քանի որ ամբողջ հայկական կայքերը, էլեկտրոնային լրատվամիջոցներն ամբողջությամբ լուսաբանում են ադրբեջանա-հունգարական գործարքը, որը նաեւ միջազգային հանրությանն ապահովում է օբյեկտիվ տեղեկատվություն, ադրբեջանցիները փորձում են նաեւ հաքերային եղանակով սահմանափակել տեղեկատվական հոսքերը՝ դրանով զուգահեռաբար մատուցելով իրենց կողմից տարածվող կեղծ տեղեկատվությունը եւ հակահայկական քարոզչությունը: Դա անընդհատ է եղել»:
Մեր հարցին՝ հայկական կողմը չի՞ կարողանում նույն կերպ հակահարված տալ, թե՞ իսկապես մեծ գումարի հարց է, պարոն Զաքարյանը պատասխանեց. «Հայկական կողմը կարող է տալ, եւ տալիս է: Մերոնք այդ հարցում չեն զիջում: Ես պետք է ասեմ, որ կարողանում ենք ապահովել նաեւ մեր տեղեկատվության միջոցների անվտանգությունը»:
Հիշեցնենք, որ հայ հաքերները կոտրել էին մասնավորապես Ադրբեջանի նախագահ Իլհամ Ալիեւի կայքը, Ադրբեջանի կապի եւ տրանսպորտի նախարարության եւ եւս մի քանի այլ պաշտոնական կարեւոր կայքեր:
Հռիփսիմե ՋԵԲԵՋՅԱՆ
Կարդացեք նաև
