«Հասարակությունում գոյություն ունեցող կարծրատիպերը խանգարում են մարդկանց լինել բաց, ազատ` հոգեբաններին, մասնագետին դիմելու հարցում, երբ նրանց մոտ խնդիրներ են առաջանում»,- այսօր լրագրողների հետ հանդիպման ժամանակ ասաց ԵՊՀ ընդհանուր հոգեբանության ամբիոնի վարիչ Հրանտ Ավանեսյանը: Եվ որպեսզի չառաջանան սթրեսածին խնդիրներ, ապա, ըստ Ավանեսյանի, պետք է կարողանալ դիմակայել, հաղթահարել ցանկացած բարդություն: Իսկ այդպես կլինի, եթե անձը ունենա ձեւավորված պաշտպանողական իմունիտետ. «Նույնիսկ շփման մեջ միմյանց ժպտալով, դրական լիցքեր հաղորդելով կկարողանանք առողջ լինել: Պետք է նշեմ, որ այսօր ինֆորմացիոն ծանրաբեռնվածությունը եւս սթրեսածին գործոն է: Իսկ դեպրեսիվ վիճակը բնորոշ է բոլորին»,-նշեց Ավանեսյանը՝ ողջունելով այն հանգամանքը, որ այսօր Հայաստանում կան լիարժեք ձեւավորված հոգեբանական կենտրոններ(ԵՊՀ-ի, Խ.Աբովյանի անվան մանկավարժական համալսարանի համապատասխան ամբիոնները), որոնք պատրաստում են պրոֆեսիոնալ հոգեբաններ:
Եվա ՀԱԿՈԲՅԱՆ
