Հոկտեմբերի 10-ը հոգեկան առողջության միջազգային օրն է: Այդ առիթով լրագրողների հետ հանդիպեց ԱՆ գլխավոր հոգեբույժ Սամվել Թորոսյանը եւ անդրադարձավ ոլորտի խնդիրներին, ձեռքբերումներին: «Հոգեկան առողջությունը մեր առողջության անբաժանելի մասն է»,- ասաց Թորոսյանը, նշելով, որ հոգեկան առողջության հետ կապված հարցերը համաշխարհային խնդիր են դարձել:
Տոնի հետ կապված էլ հայտնեց, որ Հայաստանում այն նշվում է տարբեր միջոցառումների ձեւով, հիվանդների կողմից կազմակերպված ցուցահանդեսներ են լինում, կլոր սեղան-քննարկումներ են անցկացվում հիվանդների ու նրանց հարազատների մասնակցությամբ, որի նպատակը անմիջական շփումն է. «Մեզանից պահանջվում է միմյանց նկատմամբ ուշադիր, հոգատար լինել, որովհետեւ այն, ինչ տալիս ենք շրջապատին, դա էլ ստանում ենք նրանցից: Իսկ հոգեկան առողջության մասին պետք է մտածել դեռ արգանդից, այսինքն այն պահից, երբ երեխան դեռ նոր է սաղմնավորվում»,- ավելացրեց հոգեբույժը:
Թորոսյանի փոխանցմամբ՝ հոգեկան առողջության խնդիրները նաեւ մեծապես ազդում են երկրի տնտեսության վրա: Աշխարհում այսօր հոգեկան հիվանդությունների աճի միտում կա. «Սթրեսածին կյանքում շատ են ազդակները, որ կարող են բերել հոգեկան խանգարման: Այս հիվանդությունը տարբեր տարիքի անձանց մոտ է լինում: Այսօր Հայաստանի հանրապետությունում հաշվառված են 45 000 հոգի, 1/3-ի հարաբերակցությամբ հիվանդ տղամարդիկ գերակշռում են կանանց»:
Կարդացեք նաև
Ինչ վերաբերվում է հոգեբուժարաններին, ապա ըստ Թորոսյանի, բոլոր բուժհաստատություններն ունեն խիստ վերանորոգման եւ նոր գույքի կարիք:
Թորոսյանը նաեւ տեղեկացրեց. «Մենք գնում ենք արտահիվանդանոցային բուժման, կիրառվում են ժամանակակից մեթոդներ, միջոցներ, որոնք հիվանդների մոտ չեն առաջացնում դեֆեկտածին վիճակներ: Բուժումն ընթանում է հետաքրքիր մեթոդներով, դրանցից է օրինակ նկարաբուժությունը, քանդակաբուժությունը, գոյություն ունի նաեւ մոնթերապիա կոչվածը՝ հիվանդը օրական ստանալով ընդամենը մեկ հաբ, հանգիստ գնում է տուն»:
Եվա ՀԱԿՈԲՅԱՆ
