«Արվեստների Պատկերասրահ» մշակութային հիմնադրամի նախագահ Մարիամ Շահինյանը, թավջութակահար Միքայել Հախնազարյանը (Գերմանիա) եւ սաքսոֆոնահար Հայրապետ Առաքելյանը (Գերմանիա) այսօր կայացած ասուլիսի ժամանակ պատմեցին Վերադարձի դասական երաժշտության վեցերորդ փառատոնի մասին, որի բացումը տեղի է ունեցել սեպտեմբերի 24-ին:
«Փառատոնն ունեցավ փայլուն մեկնարկ եւ հանդես է գալիս հետաքրքրիր ծրագրով եւ կատարողներով: Հոկտեմբերի 11-ին կայանալիք համերգն առանձնանում է երեւանյան պրեմիերայով. հանդես կգա գերմանական «Ֆրատրես» տրիոն` մեր տաղանդավոր հայրենակից Հայրապետ Առաքելյանի, ինչպես նաեւ` ջութակահար Ֆյոդոր Ռուդինի եւ դաշնակահար Ռուդոլֆս Վանկսի մասնակցությամբ»,-հայտնեց Մարիամ Շահինյանը;
Հայրապետ Առաքելյանն ասաց, որ տրիոն կազմավորվել է այս տարի, բայց արդեն հասցրել է հաջողություններ գրանցել. «Ներկայացնում ենք կամերային երաժշտության դասական կազմ, որը յուրահատուկ է` դաշնամուրի, ջութակի եւ սաքսոֆոնի համադրությամբ: Նման եզակի տրիոները Եվրոպայում ընդամենը մի քանի հատ են: Ես վեց տարի է` բնակվում եմ Գերմանիայում, բայց հետեւում եմ Հայաստանի մշակութային կյանքին եւ հատկապես դրական կարծիք ունեմ այս փառատոնի մասին: Մենք` երաժիշտներս, ապրում եւ սովորում ենք Գերմանիայում, եւ ուրախ ենք Հայաստանում համերգ տալու համար: Բնականաբար, ակնկալում ենք լեփ-լեցուն դահլիճ»:
Կարդացեք նաև
Դասական երաժշտության Վերադարձի վեցերորդ փառատոնի մյուս համերգը կկայանա հոկտեմբերի 16-ին: Ելույթ կունենա Գերմանիան ներկայացնող թավջութակահար Միքայել Հախնազարյանը` դաշնակահարուհի Մարիաննա Շիրինյանի հետ. «Ինձ հյուր չեմ համարում Հայաստանում, քանի որ հաճախ եմ այցելում եւ կապ պահպանում տեղի մշակույթի հետ: Հատկապես կարեւորում եմ Մարիաննա Շիրինյանի հետ ելույթս, քանի որ միշտ ցանկացել ենք համագործակցել»:
Մարիամ Շահինյանը նշեց, որ փառատոնի ծրագրում ներառված էր նաեւ Պետական երիտասարդական նվագախմբի հետ համատեղ ելույթ, սակայն վերջինս, նախնական պայմանավորվածությունից բացի, կրկին ֆինանսական պահանջներ է ներկայացրել Վերադարձի փառատոնին, այդ իսկ պատճառով համագործակցությունը չի կայացել:
Անդրադառնալով վերջերս իր մահկանացուն կնքած ՀՀ վաստակավոր արտիստ, կոմպոզիտոր Էդվարդ Միրզոյանին` տիկին Շահինյանն ասաց, որ նրա մահը մեծ կորուստ էր փառատոնի համար. «Նա կանգնած էր փառատոնի ակունքներում եւ գեղարվեստական խորհրդի նախագահն էր: Մենք նրան Վարպետ էինք անվանում , իսկ նրա տուն այցելելուց գիտեինք, որ մեր ծնողների տուն ենք գնում: Մենք երջանիկ ենք, որ շփվել ենք կոմպոզիտորի հետ»:
Լուիզա ՍՈՒՔԻԱՍՅԱՆ
