Սննդի անվտանգության պետական ծառայությունը վարչապետ Տիգրան Սարգսյանի հանձնարարականով ավարտել է ուսումնասիրությունները պանրի արտադրության ոլորտում: Այսօր կառավարության նիստին ծառայության պետ Աբրամ Բախչագուլյանը ներկայացրեց ուսումնասիրության արդյունքները: Ըստ նրա, սեպտեմբեր-հոկտեմբերին ուսումնասիրել են 59 տնտեսվարող սուբյեկտի եւ բացահայտել սանիտարահիգեինիկ պայմանների չկատարման, մակնշման եւ պահման վերաբերյալ խախտումներ: Խախտումներ արձանագրած տնտեսվարող սուբյեկտների արտադրանքում ծառայությունն արձանագրել էր աղիքային ցուպիկի մանրեներ, հիմնականում չանախ պանրի արտադրատեսակում:
Ըստ պարոն Բախչագուլյանի, 5,5 տոնննա պանիր արդեն ոչնչացվել է, 18 սուբյեկտի գործունեությունն էլ արգելվել. « Տվյալ ընկերություններն իրականացնում են սանիտարահիգենիկ պայմանների կատարման աշխատանքներ՝ ծառայության տեսուչների վերահսկողության ներքո: 59 սուբյեկտներ ենթարկվել են վարչական պատասխանատվության, տուգանքի ընդհանուր չափը կազմել է 10 միլիոն 450 հազար դրամ»:
Վարչապետը հետաքրքրվեց, թե մանրեներն ինչ վնաս են հասցնում առողջությանը, ինչին ի պատասխան էլ պարոն Բախչագուլյանը բացատրեց, որ առաջացնում է մարսողության խնդիրներ:
Վարչապետի խոսքերով. «Սննդի անվտանգության ոլորտում կարեւորագույն պարտավորություն ենք ստանձնել, որ երաշխավորենք մեր քաղաքացիներին, որ Հայաստանում վաճառվող սնունդն անվտանգ է, բայց դեռ ունենք լրջագույն խնդիրներ: Ներդնում ենք մոնիտորինգի համակարգ, որ իշխանությունները պարբերաբար իրականացնեն ստուգումներ եւ խախտումներ հայտնաբերելու դեպքում հանրությանը տեղյակ պահենք»:
Կարդացեք նաև
Արփինե ՍԻՄՈՆՅԱՆ
