«Հարսնաքար» ռեստորանային համալիրում այս տարվա հունիսին ռազմական բժիշկ Վահե Ավետյանի սպանության, նրա ընկերներին ծեծի ենթարկելու գործով այսօր ամբաստանյալների պաշտպաններ Ավագ Լալայանը, Սերգեյ Մկրտչյանը, Երեմ Սարգսյանը,Միհրան Պողոսյանը հարցաքննեցին տուժող Գարիկ Սողոմոնյանին:
Նշենք, որ Ավան եւ Նոր Նորք վարչական շրջաննրի ընդհանուր իրավասության դատարանում Գարիկ Սողոմոնյանը երկրորդ տուժողն է, որը մինչ օրս ցուցմունք է տվել: Դատական երեք նիստ պահանջվեց, որպեսզի ցուցմունք տա եւ հարցաքննվի բժիշկ Արտակ Բայադյանը, երկու նիստ է հարցաքննվում է Գարիկ Սողոմոնյանը, եւ այն դարձյալ չավարտվեց, քանի որ ամբաստանյալներից երկուսը՝ Արման Խաչատրյանն ու Արթուր Բաբլոյանը չհասցրեցին հարցեր տալ:
Պաշտպանական կողմի հարցերը գրեթե նույնն էին, ինչ տրվել էր նախորդ տուժողին:
Նրանց հետաքրքրում էր, թե ինչպես են բժիշկները հայտնվել «Հարսնաքարում», ով է նրանց դիմավորել, ով ում կողքն էր նստել ռեստորանում նախապես պատվիրված սեղանի շուրջ, բազմոցին միայն Վահեն ու Դիաննան են նստած եղել, թե նրանց ընկերներից որեւէ մեկն էլ, ով ում է հարվածել, երբ պարզաբանումների համար դուրս են եկել ռեստորանային համալիրի ավտոկայանատեղի, արդյոք բժիշկները հայհոյե՞լ են, զգուշացվե՞լ են այլ սեղանակիցների կողմից:
Կարդացեք նաև
Եղան հարցեր էլ, մասնավորապես, ռեստորանի մատուցող Դավիթ Ադամյանի պաշտպան Սերգեյ Մկրտչյանի կողմից: Խոսքը Վահեին հոսպիտալ տեղափոխելուն էր վերաբերում. ով է դրել նրան մեքենա, ինչ դիրքով է տեղափոխվել, մարմնի որ մասն ով է բռնել, արդյոք պատշաճ է եղել նրա ընկերների օգնությունը: «Չե՞ք վատացրել այդ առումով Վահեի առանց այն էլ ծանր վիճակը, բավական ծանր քաշ ունեցողին ինչպես եք տեղափոխել»:
Ամբաստանյալ, ռեստորանի մատուցող Դավիթ Ադամյանին հետաքրքրում էր, թե իրեն բժիշկները հայհոյե՞լ են, եթե ոչ, ապա ինչո՞ւ չեն ցանկացել, որ նրանց սեղանը ինքը սպասարկի:
Տուժողը չհիշեց, թե իրենց առաջինն ո՞վ է դիմավորել «Հարսնաքարում», իսկ մատուցողը հարցրեց. «Ես չե՞մ դիմավորել Ձեզ»: Ամբաստանյալի հարցադրման մեջ ագրեսիվ տոն կար, երբ մանավանդ հետեւեց հաջորդ ոչ այն է հարցը, ոչ այն է ռեպլիկը. «Հայհոյանքներով է Վահեն հաշիվը փակել»:
Նրան հետաքրքրեց, թե ո՞վ է երկրորդ անգամ իրեն կանչել եւ ինչո՞ւ:
Տուժողին հարցեր տալու պահանջ ներկայացրեց ամբաստանյալ Գարիկ Մարգարյանի պաշտպանը՝ հանրային պաշտպան Մարինե Թովմասյանը: Դատավոր Դավիթ Հարությունյանը նրան չտվեց այդ հնարավորությունը, պատճառաբանելով, թե պաշտպանը մեկ անգամ արդեն իսկ օգտվել է հարցեր տալու իրավունքից: Պաշտպանն ասաց, որ դատարանի կողմից հնարավոր սանկցիայից անկախ, ինքը չի լքի դատական նիստերի դահլիճը:
Դատավորն այս «սպառնալիքին» ի պատասխան ակնարկեց, որ դատարանը միջոցներ կձեռնարկի այլ պաշտպանով Թովմասյանին փոխարինելու համար:
Պաշտպանական կողմն այսօր ստացել էր դատարանի կողմից ոչ պաշտոնական ծանուցում «նկատի ունեցեք» հղումով: Այնտեղ պաշտպանական կողմին առաջարկվել էր գալիք դատական նիստերի ժամանակացույցը: Հիմա էլ դա դարձավ առանձին քննարկման առարկա: Պաշտպան Մ.Պողոսյանը գտնում էր, որ դատական նիստի օրը որոշումով է լինում, իսկ պաշտպան Ա.Խաչատրյանն էլ դատավորին խնդրում էր ասել, թե քրդատօրենսգրքի ո՞ր հոդվածով է նիստի օրը որոշվել:
Դատական նիստը նշանակվեց նոյեմբերի 27-ին:
Ռուզան ՄԻՆԱՍՅԱՆ
