Տերը կովերը համացանցում ճանաչել էր
Ապրիլի 4-ին երեկոյան «Առավոտի» թղթակցի բջջային հեռախոսահամարին զանգահարեց Իջեւան քաղաքի բնակչուհի Ս. Ա.-ն: Նա ասաց, որ արդեն 3 օր է, ինչ իրենց 9 կովը կորել է:
Իջեւանի բնակչուհին «Առավոտի» ինտերնետային կայքում տեսել է մեր հրապարակման մեջ պատկերված կովերը եւ ճանաչել դրանք: Կինը մեզանից տեղեկություներ էր խնդրում , թե վերջին անգամ երբ ենք տեսել դրանց, նաեւ խորհուրդ էր խնդրում անասունները գտնելու համար: Նա ասաց, որ այդ օրը՝ ապրիլի 2-ին, իրենց բարեկամներից մեկը մահացել էր, իրենք գտնվում էին սգո տանը, անասուններն առանց հսկողության են թողել:
Կարդացեք նաև
Կնոջը տվեցինք Իջեւանի քաղաքապետ Վարդան Ղալումյանի բջջային հեռախոսահամարը,ակնկալելով, որ անասունները քաղաքապետարանի աշխատակիցների կողմից արգելափակվել են: Մեկ րոպե անց անասնատերը զանգահարեց եւ մեզ շնորհակալություն հայտնեց, քանի որ կովերը իսկապես քաղաքապետարանի աշխատակիցների կողմից արգելափակված էին: Անասնատերը խոսակցության վերջում մեզ խորհուրդ տվեց , որ կովերի փոխարեն Իջեւան քաղաքի տարբեր տեղերում առկա աղբակույտերը լուսանկարենք:
Ոսկան ՍԱՐԳՍՅԱՆ
