Գրիգոր Լուսավորիչ 17 շենքի 2-րդ մուտքի բնակիչների համար անձրեւը իսկական փորձություն է: Պատճառը մուտքի առջեւ գոյացող լճակն է: Իսկ դրա պատճառն էլ այն է, որ ժամանակին, արհամարհելով մյուս բնակիչների բողոքները, պատկան մարմինները թույլ են տվել, որպեսզի նույն մուտքի առաջին հարկի բնակիչը, «առաջ գալով», գրավի բակի մի մասը, շինարարություն իրականացնի այն տարածքի վրա, ուր գտնվում է ջրահեռացման համակարգը: Ու հիմա, ամեն անձրեւից հետո բնակիչները ստիպված քարեր են գցում ջրի մեջ, որպեսզի դրանց վրայով կարողանան ելումուտ անել, իսկ երեխաներին գրկած են տանում-բերում:
Արդեն տարիներ շարունակ այստեղ գոյացող լճակի մասին մի քանի անգամ տեղյակ է պահվել համատիրությանը, որը, սակայն, սահմանափակվել է միայն փաստելով, որ պատճառը ջրահեռացման համակարգի փակված անցքն է: Բնակիչները գտնում են, որ շինարարությունը՝ օրինական, թե ապօրինի, կատարվել է ո՛չ առանց համատիրության, թաղապետարանի ու քաղաքապետարանի գիտության եւ համաձայնության, ուստի հենց նրանք էլ պարտավոր են վերականգնել իրենց իրավունքները:
Ա. ԳԱՐԵԳԻՆՅԱՆ
«Առավոտ» օրաթերթ
