Տրանսպորտի թանկացման դեմ բողոքի ակցիան ակտիվիստների կողմից շարունակվում է: Նրանք շրջում են կանգառից-կանգառ, թռուցիկներ բաժանում հասարակական տրանսպորտից օգտվողներին ու հորդորում չվճարել 150 դրամ:
Կարգին Հայկոն (Հայկ Մարությանը) եւս շարունակում է իր անձնական ավտոմեքենայով անվճար տեղափոխել քաղաքացիներին: Այսօր Հայկոյի երթուղին Օպերա-Մասիվ գիծն էր:
Ի դեպ, այս ակցիային էին միացել նաեւ նրա ընկերները՝ 10-ից ավելի ավտոմեքենաներ կոնսերվատորիայի մոտից շարժվեցին դեպի օպերա, որտեղից էլ տարբեր ուղղություններով շարունակելու էին տեղափոխել քաղաքացիներին՝ հորդորելով չվճարել 150 դրամ:
«Չեմ վճարելու 150 դրամ» ակցիային էր այսօր միացել նաեւ «Կենտրոն» հեռուստաընկերության մեկնաբան Պետրոս Ղազարյանը, որը նույնպես իր անձնական ավտոմեքենան օգտագործում էր քաղաքացիներին սպասարկելու համար ու ասաց, որ այնքան ժամանակ կոգնի, ինչքան որ կկարողանա:
Կարդացեք նաև
Aravot.am-ի հարցին պատասխանելով՝ Ձեզ չե՞ն փորձել խանգարել, ճնշումներ չե՞ն եղել, Հայկոն ասաց. «Յուրաքանչյուր հայ մարդ, ով իրեն հայ կամ հայաստանցի է համարում, նա ով կարող է ասել, որ լավ բան չես անում մարդկանց անվճար տուն տեղափոխելով, ուրեմն նա հայ, կամ հայաստանցի կոչվելու իրավունք չունի»:
Եվա ՀԱԿՈԲՅԱՆ
