Այսօր «Անի» պլազայում Քաղաքացիական զարգացման եւ համագործակցության հիմնադրամն ու քաղաքացիական հասարակության կազմակերպությունների ներկայացուցիչները ծանոթացրեցին ՔՀԿ կայունության ինդեքսի 16-րդ հրատարակության արդյունքների հետ, ինչպես նաեւ քննարկեցին Հայաստանում քաղաքացիական հասարակության զարգացման միտումները, մարտահրավերները:
ԱՄՆ Միջազգային զարգացման գործակալությունը (ԱՄՆ ՄԶԳ) հրապարակել է ՔՀԿ Կայունության ինդեքսի (ՔՀԿԿԻ) 16-րդ հրատարակությունը՝ տարածաշրջանում ակտիվ մեծաքանակ ոչ առեւտրային քաղաքացիական հասարակության կազմակերպությունների (ՔՀԿ) ընդգրկման համար։ Այն ուսումնասիրում է քաղաքացիական հասարակության համար ընդհանուր բարենպաստ միջավայրը՝ կենտրոնանալով իրավական դաշտի, կազմակերպչական կարողությունների զարգացման, ֆինանսական կենսունակության, շահերի պաշտպանության, ծառայությունների մատուցման, ենթակառուցվածքների հասարակական ընկալման վրա։
Տարածաշրջանի կտրվածքով, ՔՀԿ-ներն ընդլայնում են իրենց գործունեության ասպարեզը եւ նոր միջոցներ կիրառում՝ քաղաքացիներին եւ կառավարությանը ներգրավելու համար, ինչպես օրինակ շահերի պաշտպանության նոր օրակարգերի խթանումը, առցանց հաղորդակցության արագ աճը: Սակայն դեռեւս առկա են մարտահրավերներ, ներառյալ իրավական սահմանափակումները, շարունակվող ֆինանսական դժվարությունները, թափանցիկության պակասը եւ տարածաշրջանային կտրուկ տարբերությունները, որը սպառնում է կանգնեցնել կամ նույնիսկ ետ մղել ՔՀԿ ընթացիկ դրական զարգացումը:
Միջոցառմանը ներկա էին` ԱՄՆ ՄԶԳ Հայաստանի տնօրեն Քարեն Հիլլիարդը, Արդարադատության փոխնախարար Արամ Օրբելյանը, Քաունթերփարթ Ինթերնեշնլ Հայաստանի տնօրեն Քարել Հոֆստրան, ՔԶՀՀ փորձագետ Տաթեւիկ Մարգարյանը եւ այլք:
Կարդացեք նաև
Քարել Հոֆստրան իր խոսքում նշեց, որ իրենք աջակցում են քաղաքացիական հասարակությանը տարբեր ձեւերով: «Ուրախ ենք տեսնել բարելավումը, դա թեւ փոքրիկ է, բայց ցույց է տալիս, որ քաղաքացիական հասարակությունը գնալով ավելի մեծ ազդեցություն է ունենում հասարակության վրա: Բարելավումն առկա է օգտագործվող տարբեր միջոցներից, հատկապես օնլայն մեդիայի ոլորտում: Օրենսդրական դաշտը եւս բարելավման փուլում է: Այս առումով` արդարադատության նախարարության եւ Արամ Օրբելյանի ղեկավարությամբ աշխատանքային խումբ է ձեւավորվել ու մենք ակնկալում ենք, որ կմշակվեն նախագծեր»:
Տաթեւիկ Մարգարյանը ներկայացնելով ՔՀԿ կայունության ինդեքսը, նշեց որ դա մի գործիք է, որ չափում է քաղաքացիական հասարակության զարգացումները. «Հայաստանում ցուցանիշը բարելավել է, շնորհիվ կազմակերպական կարողությունների: Հայաստանում 2012-ի օգոստոսին հրապարակվել է օրենքի նոր նախագիծը, չնայած շատ կազմակերպություններ գտնում են, որ այն եւս բարելավման կարիք ունի»:
Արամ Օրբելյանն էլ ասաց. «Հայաստանի Հանրապետությունը վերջին մի քանի տարում փորձում է բարեփոխումներ իրականացնել, եւ այս տեսակի հետազոտությունները հնարավորություն են տալիս կենտրոնանալ կոնկրետ խնդիրների վրա»: Արամ Օրբելյանը նաեւ նշեց, որ օրենսդրական դաշտի հետ կապված որոշակի առաջընթաց ունենք:
Եվա ՀԱԿՈԲՅԱՆ
