Հայաստանի գրողների միության Տավուշի մարզային մասնաճյուղի անդամներից (նրանք չցանկացան, որ իրենց անունները հրապարակվեն) տեղեկացանք, որ Տավուշի մարզպետ Արմեն Ղուլարյանը իրենց հորդորել է հոկտեմբերի 20-ին կայացած ՀԳՄ համագումարում ձայն տալ Հովիկ Հովեյանի օգտին:
Այս տեղեկությունը ճշտելու համար զանգահարեցինք Տավուշի մարզպետարանի տեղեկատվության եւ հասարակայնության հետ կապերի բաժին: Բաժնի վարիչի պաշտոնակատար Սոֆյա Վերանյանը հարցը փոխանցեց մարզպետին, որն ասաց, թե ինքը տեղյակ չէ այդ մասին, դա հերյուրանք է:
Նշենք, որ մարզպետ Ղուլարյանի համառ ջանքերի շնորհիվ նրա խորհրդական, հայտնի շատ գործիչներին նվիրված ձոների հեղինակ, իջեւանցի բանաստեղծ Լյուբիկ Չիբուխչյանը այս տարի դարձել է Հայաստանի գրողների միության անդամ, մարզպետ Արմեն Ղուլարյանը նրա փոխարեն անձամբ է մուծել Գրողների միության անդամավճարը:
Ի դեպ, Լյուբիկ Չիբուխչյանը չի մասնակցել հոկտեմբերի 20-ին կայացած գրողների արտահերթ համագումարին:
Կարդացեք նաև
Նույն աղբյուրի համաձայն՝ Լոռու մարզպետ Արթուր Նալբանդյանը ՀԳՄ Լոռու մարզային մասնաճյուղի անդամներին հորդորել է ձայն տալ Հովիկ Հովեյանին: Լոռու մարզպետ Արթուր Նալբանդյանը մեզ ասաց, որ նման բան չի եղել, որ ինքը զարմացած է մեր հարցից, որ դա իր լիազորությունների սահմաններից դուրս է:
Ոսկան ՍԱՐԳՍՅԱՆ
