Մայիսի 10-ի առավոտյան Իջեւանի սահմանագոտում հրազենային վնասվածք ստացած եւ հիվանդանոցի ճանապարհին մահացած, ժամկետային զինծառայող, 1995թ. ծնված Ներսես Ղազարի Կարապետյանի մահվան գործով քրեական գործ է հարուցվել ՀՀ քրեական օրենսգրքի 365 հոդվածի 3-րդ մասի հատկանիշներով («Հայաստանի Հանրապետության վրա անակնկալ հարձակումը ժամանակին հայտնաբերելու եւ դրան դիմակայելու կամ Հայաստանի Հանրապետության անվտանգության ապահովմանն ուղղված մարտական հերթապահության կամ մարտական ծառայություն կրելու կանոնները խախտելը, որն առաջացրել է ծանր հետեւանքներ»): Այս մասին տեղեկացանք Լոռու զինվորական կայազորի դատախազ Արթուր Զաքարյանից:
Դատախազը հայտնեց, որ մարտական հերթապահության հենակետից առգրավվել են իրեղեն ապացույցներ՝ հրազեն, փողապարկուճներ, կատարվում են մարտական հենակետում գտնվածների հարցաքննություններ, քրեական գործով նշանակվել են մի շարք փորձաքննություններ: Արթուր Զաքարյանն ասաց, որ քրեական գործով ձերբակալված անձ չկա: Նա վստահեցրեց, որ կատարվելու է օբյեկտիվ եւ համակողմանի քննություն դեպքի հանգամանքները բացահայտելու համար:
Ոսկան ՍԱՐԳՍՅԱՆ
