2012թ. դեկտեմբերի լույս 25-ի գիշեը Իջեւան քաղաքի Երեւանյան փողոցում գտնվող, քաղաքի ավագանու անդամ Արտակ Խաչատրյանի ոսկու խանութից գողացել են 50 միլիոն դրամի ոսկե եւ արծաթե զարդեր: Այդ կապակցությամբ հարուցված քրեական գործով, ՀՀ քրեական օրենսգրքի 177 հոդվածի 3-րդ մասի 1-ին կետով մեղադրվում է Իջեւան քաղաքի բնակիչ, ծագումով Բերդի տարածաշրջանից, 1981թ. ծնված Գագիկ Սարգսյանը:
Համաձայն մեղադրական եզրակացության՝ նա գողությունը կատարել է Երեւանի բնակիչ Մհեր Խլղաթյանի հետ: Սույն գործով դատավարությունն ընթանում է Տավուշի մարզի առաջին ատյանի դատարանի Իջեւանի նստավայրում:
Սույն դատավարության հուլիսի 4-ի նիստում լսվեց քրեական գործով նախկին մեղադրող Յուրի Բաղյանի կողմից 2014թ. ապրիլի 26-ին դատարան ներկայացված միջնորդությունը, որով մեղադրողը, տուժողի ցուցմունքի հիման վրա, պահանջել է փոփոխություն կատարել առաջադրված մեղադրանքում, գողությամբ պատճառված վնասը համարել 66 միլիոն դրամ:
Ամբաստանյալի պաշտպաններ Գուրգեն Հարությունյանը եւ Ռուբեն Հակոբյանն առարկեցին այդ միջնորդության դեմ, նշելով, որ դատարան ներկայացված փաստաթղթերով չի ապացուցվում, որ գողությամբ պատճառված վնասը կազմում է 50 կամ 66 միլիոն դրամ: Դատավոր Ռաֆիկ Մելքոնյանը վճռեց, որ այս միջնորդությանն կանդրադառնա վերջնական դատական ակտ կայացնելու ժամանակ:
Կարդացեք նաև
Այնուհետեւ դատարանը պետք է սկսեր ամբաստանյալ Գագիկ Սարգսյանի հարցաքննությունը: Վերջինս ընդմիջում խնդրեց, որպեսզի խորհրդակցի իր պաշտպանների հետ: Նիստը վերսկսելուց հետո ամբաստանյալը հայտարարեց, որ ցուցմունք կտա գրավոր ապացույցները հետազոտելուց հետո:
Սկսվեց քրեական գործում առկա գրավոր ապացույցների հետազոտումը: Նիստի ընթացքում քրեական գործով նոր մեղադրող Ներսես Չիլինգարյանն ամբաստանյալին հարցրեց,թե Մհեր Խլղաթյանը նրա ի՞նչ բարեկամն է: Գագիկ Սարգսյանն ասաց, որ նա իր հորաքրոջ որդին է:
Նշենք, որ Մհեր Խլղաթյանը Մոսկվայում ոսկու խանութից առավել խոշոր չափերով գողության համար կալանավորված է: Այդ մասին ռուսական հեռուստաընկերություններից մեկը ռեպորտաժ է ցուցադրել:
Ոսկան ՍԱՐԳՍՅԱՆ
