Տեղեկացրել ենք, որ օգոստոսի 10-ին ադրբեջանական գնդակոծության հետեւանքով սահմանամերձ Այգեպար գյուղում այրվել են Արշալույս Գեւորգյանի եւ Վանո Վարդազարյանի երկհարկանի տները՝ գույքի հետ միասին:
Այգեպարի գյուղապետ Անդրանիկ Այդինյանն ասաց, որ Վանո Վարդազարյանի ամուսնացած աղջիկը Ռուսաստանում է բնակվում: Վ. Վարդազարյանը եւ նրա կինը Ռուսաստան են գնացել թոռնիկի կնունքին մասնակցելու համար: Վանոն Ռուսաստանում հեռուստատեսությամբ է իմացել իր տան այրվելը:
Տավուշի մարզպետարանից հայտնում են,որ մարզպետ Հովիկ Աբովյանի նախաձեռնությամբ եւ «Հայաստան» համահայկական հիմնադրամի աջակցությամբ այգեպարցի 2 ընտանիքների բնակարանային խնդիրը լուծվել է, նրանց համար ձեռք են բերվել 3 սենյականոց բնակարաններ՝ համապատասխան գույքով:
Անդրանիկ Այդինյանից տեղեկացանք, որ ադրբեջանական գնդակոծության հետեւանքով տնազուրկ դարձած 2 ընտանիքների համար Այգեպարի բազմաբնակարան շենքում բնակարաններ են գնվել: Դրանց տերերն ապրում են Երեւանում:
Կարդացեք նաև
Արշալույս Գեւորգյանը մեզ ասաց, որ հրդեհից հետո հաջողվել է փրկել միայն իրենց հին, 1976թ. արտադրության «Ժիգուլին»: Նա հայտնեց, որ ինքը տեսել, հավանել է նոր բնակարանը, վաղը այնտեղ կմիացնի բնական գազի, էլեկտրաէներգիայի եւ ջրամատակարարման սնուցումը: Արշալույսն ասաց, որ իրենք այլեւս հարեւաններին նեղություն չեն տա, նրանց տանը չեն գիշերի:
Արշալույս Գեւորգյանը ապրում է կնոջ եւ 52-ամյա որդու հետո, ով մանկուց 2-րդ խմբի հաշմանդամ է: Այգեպարի գյուղապետը խնդրին արագ լուծում տալու համար շնորհակալություն հայտնեց մարզպետ Հովիկ Աբովյանին:
Ոսկան ՍԱՐԳՍՅԱՆ
