Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը հերթական անգամ բավարարեց մեղադրանքը պաշտպանող դատախազի՝ ՀՀ գլխավոր դատախազության կիբեռ հանցագործությունների վարչության դատախազի միջնորդությունը՝ մեկ ամիս ժամկետ իրենց տրամադրելու համար:
Դատախազը հայտնեց, որ ապրանքագիտական փորձաքննություն պետք է անցկացվի, առանց որի չի կարող ավելացնել «Հայբիզնեսբանկ» ՓԲ ընկերության վարչության նախկին նախագահ Արա Կիրակոսյանի եւ նրա տեղակալ, տարածքային զարգացման եւ տեղեկատվական տեխնոլոգիաների դեպարտամենտի նախկին տնօրեն Մելիք Եսայանի մեղադրանքը:
Արա Կիրակոսյանի պաշտպան, ՀՀ փաստաբանների պալատի անդամ Հակոբ Ճարոյանը հայտարարեց, որ նախկինում դատախազը մեկ ամիս ժամանակ խնդրեց դատարանից, դատարանը նրան տրամադրեց 20 օր ժամանակ, ապա եւս 20 օր տվեց՝ մեղադրանք առաջադրելու համար: Ըստ պաշտպանի՝ անմեղության կանխավարկածի փոփոխություն է տեղի ունենում, «մեղավորության կանխավարկածով» է շարժվում մեղադրանքի կողմը:
Հիշեցնենք, որ Ազգային անվտանգության ծառայությունում է գտնվել այս գործը, Արա Կիրակոսյանին մեղադրանք է առաջադրվել, որ նա նույն վարչության նախագահի տեղակալ Մելիք Եսայանի հետ Իրանի Իսլամական Հանրապետության եւ ԱՄՆ քաղաքացի Մաջիդ Նազիֆի, Հայաստանում գրանցված «Ալֆա Ջեներալ թրեյդինգ» ՍՊ ընկերության հիմնադիր Բեհրուզ Բեհնամի, Շվեյցարիայում գրանցված «Կոսմոս տրադինգ» ընկերության հիմնադրի եւ ՀՀ մի քանի քաղաքացիների հետ 2012թ. օգոստոսից մինչեւ 2013թ. մարտը կեղծ պայմանագրերով եւ վճարման հանձնարարականներով «Հայբիզնեսբանկ» ընկերությունից հափշտակել է 5.804.577.000 ՀՀ դրամին համարժեք 10 մլն 980 հազար եվրո գումար:
Կարդացեք նաև
Դատարանը բավարարեց դատախազի միջնորդությունը եւ մայիսի 18-ին նշանակեց դատական նիստ, ակնկալելով, որ մինչ այդ նախաքննության մարմնի կողմից մեկ այլ քրեական գործով դատարան կուղարկվեն դատաապրանքագիտական փորձաքննության արդյունքները: Ըստ այդմ` պարզ կդառնա, թե այդ գործով մեղադրանքի ծավալը ավելանո՞ւմ է, թե՞ մեղադրանք ընդհանրապես չի առաջադրվում:
Ռուզան ՄԻՆԱՍՅԱՆ
