Որպես կանոն՝ լայն արձագանք գտնող կալանավորման որոշումներով հանրությանը հայտնի դատավոր Մնացական Մարտիրոսյանը այսօր դատավորների ընդհանուր ժողովից առաջ լրագրողներին հանդիմանեց՝ իր պատկերացմամբ իրենց աշխատանքը վատ կատարելու համար։
«Ձեզանից դուրս անհիմն հանգամանքների մասին եք գրում, ձեր աշխատանքը շատ վատ եք կատարում»,- ասաց նա։
Հակադարձմանը, որ իր մասին էլ են նման բաներ ասում, ավելին՝ մեղադրում են անբարեխիղճ աշխատանքի մեջ, և հորդորին՝ փաստարկել, թե լրագրողներն ի՞նչ են արել, որը սխալ է, պատասխանեց․ «Օրինակ, գրել են, որ Շանթ Հարությունյանի որդին, դատավորը գտել է, որ պետք է կալանավորվի։ Բայց դատական ակտում առանձին իմ կողմից գրված է, որ ազատազրկում պատիժ չպետք է կրի Շահեն Հարությունյանը և մինչև վերջ չի կրել։ Ժիրայր Սեֆիլյանը։ Երբ որ հինգ տարի ազատազրկում էի միջնորդել միայն հրազենի, ռազմամթերքի համար պատասխանատվության ենթարկել, բոլորովին այլ մեկնաբանություն էր»։
Դիտարկմանը, որ իր նախագահած նիստերի ժամանակ մարդիկ են մահացել, դատավորը պատասխանեց․ «Մարդիկ ընդհանրապես աշխարհում մահանում են։ Այո, կարող է երկու դեպք եղած լինի։ Մեկը նիստի ընթացքում է եղել, մյուսն էլ վարույթի ընթացքում։ Դրանց պետք է մոտենալ այնպես, ինչպես իրականում կան։ Ոչ թե նրա համար, որ դատական քննության ընթացքում են վատ վիճակում հայտնվել, այլ որ պարզվել է՝ այդ մարդիկ վատառողջ են եղել և պատահաբար մահացել են»։
Կարդացեք նաև
Հարցին, թե Սուրբ Աննա եկեղեցում Նիկոլ Փաշինյանի թիկնազորի հետ միջադեպի մասնակից դպրոցահասակ Դավիթ Մինասյանին ինչո՞ւ կալանավորեց, Մնացական Մարտիրոսյանը պատասխանեց․ «Դավիթը շատ դրական բնութագրով անձնավորություն է։ Բայց այդ կարգի լավ բնութագրություն ունեցող անձնավորությունը ենթադրաբար ինչ-որ գործողություն է կատարում։ Բա քննիչի միջնորդությունն ասում է՝ հլը մի հատ խափանման միջոցն ընտրենք՝ տեսնենք՝ ո՞ւմ հետ է այս մարդը համագործակցում, ո՞վ է իրեն ստիպել, որ էսքան լավ բնութագրվող անձնավորությունը կարող է գա, ենթադրաբար կատարի էդ արարքը։ Բա մի հատ չտեսնե՞նք։ Եվ պարզվեց, որ նա ճիշտ է։ Չբեկանվեց այդ որոշումը։ Հաջողություն ձեզ»։
Աշոտ ՀԱԿՈԲՅԱՆ
