Գոռ Առաքելյանի պաշտպան Երեմ Սարգսյանը նախորդ դատական նիստին միջնորդել էր, որպեսզի Գոռ Առաքելյանին դատահոգեբուժական եւ դատահոգեբանական փորձաքննություն նշանակեն: Ըստ նրա՝ Գոռ Առաքելյանին մեղսագրվող արարքներին ճիշտ քրեաիրավական գնահատական տալու համար խիստ էական էր այնպիսի հանգամանք, որի պարզաբանման ուղղությամբ, ըստ պաշտպանի, որեւէ գործնական քայլ չէր կատարվել, չնայած այդ մասին բարձրաձայնվել էր: Խոսքը, ըստ պաշտպանի, Գոռ Առաքելյանի հոգեբանական վիճակի մասին էր:
Ի դեպ, միջնորդությունը նախաքննության մարմնի կողմից նույնպես մերժվել էր եւ ըստ պաշտպանի՝ միջնորդությունը մերժելու որոշման մեջ նախաքննական մարմինը նշել էր այնպիսի պատճառաբանություն, որն, ըստ էության, նշանակություն էլ չունի հանցավոր արարք կատարելու պահին աֆեկտի վիճակում գտնվելու կամ չգտնվելու հարցի պարզաբանման համար: Քննիչը մերժել էր հետեւյալ ձեւակերպմամբ, ինչը այսօր, ի դեպ, կրկնեց նաեւ դատախազը, անհիմն համարելով պաշտպանի միջնորդությունը, մասնավորապես՝ փորձաքննություն նշանակելու անհրաժեշտություն սույն գործով առկա չէ, քանի որ Առաքելյանը հոգեկան խիստ հուզմունքի վիճակում չի գտնվել:
Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը մտել է խորհրդակցական սենյակ: Պաշտպանի միջնորդել էր, որպեսզի փորձաքննության կատարումը իրականացվի «Նուբարաշեն» հոգեբուժական կենտրոն ՓԲ ընկերության փորձագետների միջոցով:
Երեմ Սարգսյանն այսօր հարց բարձրացրեց, թե ովքե՞ր են փորձագետները եւ պաշտպանության կողմը կարեւորել էր հետեւյալ հարցերը՝ արդյոք անցյալ տարվա մայիսի 17-ին տեղի ունեցած իրադարձությունների ժամանակ արարքը կատարելու պահին Գոռ Առաքելյանը գտնվել է այնպիսի հոգեկան վիճակում, որը կարող էր էապես ազդել նրա գիտակցության եւ հոգեկան գործունեության վրա, մեղսագրվող արարքը կատարելու պահին գտնվե՞լ է աֆեկտի վիճակում, թե՞ ոչ:
Կարդացեք նաև
Ռուզան ՄԻՆԱՍՅԱՆ
