«Ազատության հրապարակում տեղի ունեցած հանրահավաքը որեւէ առնչություն չունի «Ո՛չ թալանին» նախաձեռնության հետ»,- մեզ հետ զրույցում ասաց նախաձեռնության անդամ ԱՐԹՈՒՐ ՔՈՉԱՐՅԱՆԸ
-Արթուր, ի՞նչ պատճառով է «Ոչ թալանին» նախաձեռնությունը հրաժարվել մասնակցել հանրահավաքին, ի վերջո հայտարարվել էր, որ այն սակագնի թանկացման դեմ է լինելու:
-Մենք այս պայքարին այլ մոտեցում ունենք եւ մեր ռազմավարությունն ենք մշակել հետագա քայլերն անելու համար: Հանրահավաքի կազմակերպիչների հետ խոսելուց հետո հասկացանք, որ մեր նպատակներն ու օրակարգերը տարբեր են, ուստի որոշեցինք առանձին շարունակել էլեկտրաէներգիայի սակագնի բարձրացման դեմ պայքարը:
Բայց դա չի նշանակում, թե հասարակությունը պառակտվել է: Ես միշտ ասել եմ եւ հիմա էլ պնդում եմ, որ հասարակության, պայքարող ժողովրդի մեջ որեւէ պառակտում չկա, որքան էլ որոշ ուժեր փորձեցին մարդկանց տարբեր բանակների բաժանել: Պարզապես ցուցարարները պայքարի իրենց պատկերացումներն ունեն, որն առավել արդյունավետ են համարում, եւ փորձում են այդ կերպ իրենց բողոքն արտահայտել, այդ կերպ հասնել գլխավոր նպատակին:
Կարդացեք նաև
Ես դրան բացասաբար չեմ վերաբերվում: Կարծում եմ՝ որքան շատ լինեն պայքարի ճակատները, այնքան հարցերն ավելի արդյունավետորեն կլուծվեն, քանի որ ճնշման ազդեցությունը մի քանի տեղից կլինի:
-Հանրահավաքի կազմակերպիչներից մեկն էլ Երեւանի ավագանու «Բարեւ Երեւան» խմբակցության անդամ Դավիթ Սանասարյանն էր, որը Բաղրամյան պողոտայում նախագահի հրաժարականի կոչեր էր անում: Փաստորեն նա ոչ միայն սակագնի թանկացման դեմ պայքարի իր տեսլականն ունի, այլեւ հավաքն այլ ուղղությամբ տանելու: Արդյոք այդ հանգամանքը ե՞ւս ձեզ զերծ չի պահել նոր նախաձեռնության կողքին լինելուց:
-Այս պահին իշխանափոխության կոչերն արդիական չեն, մենք այդ ուղղությամբ պայքարը տանելու անհրաժեշտություն չենք տեսնում։ Մեր հավաքների ժամանակ, ճիշտ է, ոչ հարթակից, բայց հասարակության միջից արվել են քաղաքական պայքարի կոչեր: Դա ժողովրդի իրավունքն է, բայց մենք ամեն ինչ արեցինք պայքարն այդ ուղղությամբ չտանելու համար: Եվ այսօր էլ նույն դիրքորոշումն ունենք:
Ես, իհարկե, չգիտեմ, թե իրականում ինչ նպատակներ ունեն պայքարի երկրորդ ճակատ բացածները, բայց դեռ չշտապենք հետեւություններ անել:
Թագուհի ԱՍԼԱՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում