Սյունիքի մարզպետ Սուրիկ Խաչատրյանի տան մոտ հնչած կրակոցների գործով Սյունիքի մարզի ընդհանուր իրավասության դատարանում այսօր նշանակված նիստը չկայացավ:
Aravot.am-ի հետ զրույցում Բուդաղյանների պաշտպան Հայկ Ալումյանը փոխանցեց, որ այսօրվա նիստը հետաձգվել է իր միջնորդությամբ. «Երևանում գործնական հրատապ խնդիր ունեի, ուստի իմ միջնորդությամբ նիստը հետաձգվեց»: Հաջորդ նիստը տեղի կունենա օգոստոսի 20-ին ժամը 14.15-ին՝ Սյունիքի մարզի ընդհանուր իրավասության դատարանում:
Հիշեցնենք, որ մեկ ամիս առաջ հրավիրված նիստը կրկին հետաձգվել էր՝ այն անգամ դատախազ Կարեն Հարությունյանի միջնորդությամբ՝ արձակուրդի գնալու պատճառաբանությամբ: Այս փաստը Հայկ Ալումյանը մտահոգիչ էր համարել՝ կարծիք հայտնելով, որ փորձ է արվում նիստը հետաձգել ու նշանակել օգոստոսին՝ արձակուրդների ժամանակահատվածում, որ հանրության աչքից հեռու մնա:
Տաթև ՀԱՐՈՒԹՅՈՒՆՅԱՆ
