Երեխաների թունավորման պատճառները հանրապետության գլխավոր վարակաբանը մեծամասամբ կապում է շոգ եղանակի հետ
Այս տարի թունավորման դեպքերը մի քիչ ավելին են, քան նախորդ տարի էր: Այսօր այս մասին «Հայելի» ակումբում ասաց հանրապետության գլխավոր վարակաբան, «Նորքի ինֆեկցիոն» հիվանդանոցի ղեկավար Արա Ասոյանը: Ըստ նրա՝ դեպքերի ավելացում է արձանագրվել, որովհետեւ այս տարի օդի ջերմաստիճանն ավելի բարձր է. «Անցյալ տարի 40-41 աստիճան շոգ չենք ունեցել: Բայց որ ասեմ՝ սարսափելի թիվ է, ազգային անվտանգության խնդիր է, տենց բան չկա, սիրելիներս»:
Ասոյանը խորհուրդ է տալիս ցերկվա շոգի ժամերին, եթե մարդիկ կարող են, հաց չուտեն, ջուր, հեղուկ խմեն. «Շոգին չի կարելի սնվել, մանավանդ մեր ծանր սնունդները, խմորեղենները, նորմալ սնվեք, թան խմեք»:
Կարդացեք նաև
Արեւի տակ դրված ձմերուկներն էլ, ինչպես հորդորեց գլխավոր ինֆեկցիոնիստը, չգնել, միայն սառնարանային պայմաններում պահվող ձմերուկը գնել.«Թե չէ, ձմերուկը լավ բան է, շատ կերեք»:
Այս սեզոնին երեխաների մոտ հաճախակի նկատվող փորուծություններն էլ պարոն Ասոյանը կրկին շոգ եղանակով պայմանավորեց՝ «Այս շոգ եղանակին երեխաների աղիները դժվար են մարսում սնունդը»:
Aravot.am-ը խնդրեց Ասոյանին անդրադառնալ վերջերս ճամբարներում եւ մանկապարտեզում երեխաների թունավորման դեպքերին: Ասոյանն ասաց, որ ճամբարի երեխաների մոտ աղեստամոքսային տրակտի խանգարումներն են եղել, շոգին սնունդը շուտ որակազրկվում է, բոլորը չէ, որ կարողանում են մարսել, ինֆեկցիոն գործոն չի եղել: Մեր այն հարցին՝ արդյոք երեխաների հետ աշխատող մասնագետները չպիտի՞ հատուկ սննդակարգ մշակեն՝ հաշվի առնելով եղանակի գործոնն ու երեխաների հանգամանքը, բժիշկը պատասխանեց. «Կոտայքի մարզի դեպքն առանձնացնում եմ. այնտեղ մայրիկը տորթ էր թխել տանը ու բերել էր, այն երեխաներն էլ, որ կերել էին, խնդիր է եղել»: Մեր այն դիտարկմանը՝ չպիտի՞ մայրիկին արգելեին այդ տորթը հյուրասիրել երեխաներին, Ասոյանն ասաց՝ «Այո, պիտի արգելեին»:
Հիշեցնենք, որ վերջին շրջանում թունավորման դեպքեր են եղել Վայոց ձորի մարզի ճամբարում, որտեղից 16 երեխա է հոսպիտալացվել, թունավորման դեպք է եղել նաեւ ԵԿՄ-ի ճամբարում հանգստացող երեխաների շրջանում, ինչպես նաեւ «Հատիսի լանջին» ռեստորանում հարսանիքի 30-ից ավելի հյուրերի մոտ:
Ասոյանը ռեստորանային բիզնեսով զբաղվողներին խորհուրդ տվեց թունավորումներից խուսափելու համար հրավիրել սննդի մասնագետի, որն այս շոգ եղանակին համապատասխան սննդակարգ կկազմի եւ խնդիրներ չեն լինի:
Նելլի ԲԱԲԱՅԱՆ
