Չնայած դրան՝ գործողությունների արդյունքում սպանվել է 16 հույն եւ 2 հայ
«Հույն ավագ սերունդի բնորոշմամբ՝ Կոստանդնուպոլիսը ոչ թե 1453-ին է վերցվել թուրքերի կողմից, այլ՝ 1955-ին»,- սեպտեմբերի 7-ին «Նոյան տապան» մամուլի ակումբում լրագրողների հետ հանդիպման ընթացքում, անդրադառնալով 1955 թվականի սեպտեմբերի 6-7-ը Ստամբուլում տեղի ունեցած հակահունական եւ հակահայկական ջարդերին, ասաց տարածաշրջանային հարցերով փորձագետ-վերլուծաբան Սարգիս Հացպանյանը:
Նա նշեց, որ այդ ժամանակ Կոստանդնուպոլսում հույների թիվը մոտավորապես 150 հազար է եղել: Նրա խոսքերով ամեն ինչ սկսվել է նրանից, երբ սեպտեմբերի 5-ին Թուրքիայի ազգային անվտանգության ծառայության գաղտնի գործակալը Հունաստանում Թուրքիայի դեսպանատանը ռումբ է պայթեցրել. «Թուրքիայի ազգային անվտանգության համակարգը բանակի հետ այս ամենը կազմակերպել է ամսի 5-ը 6-ին կախող գիշերը մոտ 300 հազար մարդ տեղափոխել է ավտոբուսներով, բեռնատարներով եւ գնացքներով Կոստանդնուպոլիս՝ Իստամբուլ, եւ այդ ամբոխը, այդ խուժանը, բաշիբոզուկները հրամանի էին սպասում, բոլորը զինված էին: Զենք ասելով պետք է հասկանալ փայտեր, շղթաներ, կացիններ, բահեր, բայց ոչ կրակող զենքեր, որովհետեւ հրաման էր տրված, որ սպանություններ տեղի չունենան, թո՛ղ թալան, ավար լինի, բռնաբարություն, վախեցնել, ծեծուջարդ, բայց ոչ սպանություն»:
Սարգիս Հացպանյանը նկատեց, որ չնայած հրաման չկար՝ սպանություն կատարել, գործողությունների արդյունքում սպանվել է 16 հույն եւ 2 հայ. «4348 խանութ հույներին պատկանող ոչնչացվել է, ամբողջ ունեցվածքը թալանված է, ավերվել է 110 հյուրանոց, 27 դեղատուն, 23 դպրոց, 21 գործարան, 73 եկեղեցի, հատկապես՝ հույն ուղղափառ կրոնին դավանող եկեղեցի, 2 վանք, 1 սինագոգ, 1000-1500 տուն»:
Կարդացեք նաև
Ամի ՉԻՉԱԿՅԱՆ
