Բերդի տարածաշրջանի Պառավաքար, Տավուշ գյուղերի բնակիչների խաղողի բերքի ընդունման հարցը լուծվել է: Պառավաքարի եւ Տավուշի գյուղապետեր Ռոլանդ Մարգարյանը եւ Արթուր Հովհաննիսյանը հայտնեցին, որ այն լուծվեց Տավուշի մարզպետ Հովիկ Աբովյանի միջամտությունից հետո: Երեւանի կոնյակի գործարանի Բերդի մասնաճյուղում բոլոր տարաները լցված են եղել, խաղող ընդունելու հնարավորություններ չկային: Տավուշ համայնքի ղեկավարը հայտնեց, որ հոկտեմբերի 8-ին Արծվաբերդի, Չինարիի, Այգեձորի, Տավուշի, Պառավաքարի խաղողագործները մինչեւ գիշերվա ժամը 1-ը Բերդ քաղաքում խաղող են հանձնել:
Երեւանի կոնյակի գործարանի Բերդի մասնաճյուղի տնօրեն Գարիկ Վարդանյանը հայտնեց, որ 320 տոննա հումք են տեղափոխել գործարանի Այգավանի մասնաճյուղ, որ կարողացել են վերսկսել խաղողի ընդունումը: Նրա ասաց, իրենք շահագրգիռ էին Բերդի տարածաշրջանի խաղողի ողջ բերքը մթերելու, ասելով հանդերձ , որ հարցի լուծմանը նպաստել է մարզպետ Հ. Աբովյանի միջամտությունը: Նա ասաց, որ ըստ խաղողագործների հետ կնքված պայմանագրերի ՝իրենք պետք է ընդունեին 4100 տոննա խաղող, սակայն ընդունել են իրենց համար ռեկորդային քանակության՝ 5078 տոննա խաղող: Գ. Վարդանյանի խոսքերով՝ Բերդի տարածաշրջանում խաղողի ողջ բերքն արդեն հավաքված է: Բերդի մասնաճյուղում խաղողի դիմաց գումարը փոխանցվում է 3 օրվա ընթացքում:
Ոսկան ՍԱՐԳՍՅԱՆ
