Այսօր ՀՀ Վերաքննիչ քաղաքացիական դատարանը հրապարակեց Երևանի մետրոպոլիտենի երեք նախկին աշխատակիցների գործով վճիռը: Դատարանը որոշել է մերժել «Մետրոպոլիտենի» նախկին աշխատակիցների՝ Սեւակ Հովհաննիսյանի, Անդրանիկ Գեւորգյանի եւ Գագիկ Գալստյանի բողոքը եւ մասնակիորեն բավարարել «Մետրոպոլիտեն» ՓԲԸ-ի վերաքննիչ բողոքը:
Վերաքննիչ դատարանը բեկանել է Երեւան քաղաքի Արաբկիր եւ Քանաքեռ- Զեյթուն վարչական շրջանների ընդհանուր իրավասության դատարանի վճիռը, որով «Մետրոպոլիտենը» պարտավորվում էր՝ աշխատանքում չվերականգնվելու դիմաց հատուցել նախկին աշխատակիցներին նրանց աշխատավարձի հնգապատիկի չափով գումար:
Վճիռը՝ շուտով տեսանյութում.
Հիշեցնենք, որ այս գործով վերաքննիչ էին դիմել եւ՛ «Մետրոպոլիտենի» աշխատակիցները, ե՛ւ հենց ընկերությունը:
Կարդացեք նաև
Aravot.am-ի հետ զրույցում «Մետրոպոլիտենի» աշխատակիցների ներկայացուցիչ Քրիստինա Գևորգյանը նշել էր, որ իրենք Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի կայացրած վճռի հետ համաձայն չեն՝ աշխատանքում չվերականգնելու մասով, ինչպես նաև այն հիմքով, որ որպես ծայրահեղ միջոց աշխատանքում չվերականգնելու դեպքում որպես հատուցում հաշվարկվել է իրենց միջին աշխատավարձի հնգապատիկը, ոչ թե օրենքով սահմանված առավելագույն չափը՝ տասներկուապատիկը:
Երևանի մետրոպոլիտենն իր հերթին բողոքարկել էր վճիռը այն հիմքով, որ դատարանը պատշաճ քննության առարկա չի դարձրել իրենց կողմից ներկայացված ապացույցները՝ աշխատողների կողմից թույլ տրված ենթադրյալ խախտումների վերաբերյալ:
«Մետրոպոլիտենի» նախկին աշխատակիցները նշեցին, որ այս պահին իրենք զբաղվածության խնդիր ունեն, աշխատանք չեն կարողանում գտնել, գտածն էլ ժամանակավոր է:
Անդրանիկ Գեւորգյանը Aravot.am-ի հետ զրույցում անհասկանալի համարեց դատարանի վճիռը, նշեց, որ իրենք իրենց անելիքները կորոշեն միայն իրենց ներկայացուցիչի՝ Քրիստինե Գեւորգյանի հետ քննարկումից հետո (Քրիստինե Գեւորգյանը դատական նիստին ներկա չէր- Հ. Հ.), բայց որ պայքարելու են, փորձելու են արդարությունը վերականգնել, միանշանակ է:
Գագիկ Գալստյանն էլ նշեց. «Պայքարելու ենք: Սա մեզ ձեռնտու որոշում չէր, արդարության համար պետք է պայքարենք մինչեւ վերջ»: Նա նշեց, որ արդեն կասկածներ ունեն, որ դատական համակարգն իրենց գործում անկախ չէ:
«Արդեն կան կասկածներ, որ միշտ ճիշտ նժարով չեն դատում,- ասաց նա՝ ավելացնելով,-ոչ ոք չի մտածում, որ այս մարդիկ հնարավորություն չունեն ապրելու: Մենք ընդամենն այդ մասնագիտությունն ունենք, ուրիշ մասնագիտություն չունենք, 15 տարի աշխատել ենք, եւ չգիտես ի՞նչ պայմաններում, ում որոշումներով կատարվեց այդ քայլը: Մենք ընտանիքներ ունենք, կոմունալ վճարումներ ունենք, տուն ունենք, վարձով ենք ապրում. այդ ամեն ինչը մի կողմ են դրել, չգիտես ինչո՞ւ հիմնարկի շահերը բարձր պահելու համար… Հայաստանի քաղաքացի ենք, բայց չենք կարողանում արժանապատիվ ապրել, տեսնում ենք դատարանում այսպիսի որոշում: Ոչ ոք չի հետաքրքրվել, թե այս մարդիկ այս երկու տարիների ընթացքում ինչպես են ապրում»:
Հռիփսիմե ՀՈՎՀԱՆՆԻՍՅԱՆ
