Ինչպես արդեն տեղեկացրել ենք` Եվրոպայի խորհրդի խորհրդարանական վեհաժողովի ձմեռային նստաշրջանի այսօրվա նիստում (ԵԽԽՎ) մերժվեց Ռոբերտ Ուոլթերի «Բռնության աճը Լեռնային Ղարաբաղում ու Ադրբեջանի մյուս օկուպացված տարածքներում» զեկույցը:
Այն դրվեց քվեարկության և ԵԽԽՎ պատվիրակները ձայների 74 «կողմ», 83 «դեմ» հարաբերակցությամբ մերժեցին զեկույցը` այն հետ ուղարկելով ԵԽԽՎ քաղաքական հարցերի և ժողովրդավարության հանձնաժողով:
Մինչ քվեարկությունը՝ բավականին սուր ելույթ ունեցավ ԵԽԽՎ հայաստանյան պատվիրակության անդամ Արմեն Ռուստամյանը` հիշեցնելով, որ Ադրբեջանը Հայաստանի հետ սահմանին օգտագործում է ծանր զինտեխնիկա, հակադրեց, թե զեկույցի համաձայն` դեռ մի բան էլ միակ մեղավորը Հայաստանն է, իսկ Ադրբեջանը խաղաղարար է ներկայացվում:
Պարոն Ռուստամյանը սա «ցինիզմ» համարեց: Այնուհետև հավելեց. «Այս զեկույցներով ԵԽԽՎ-ն խոչընդոտում է ԵԱՀԿ Մինսկի խմբի ջանքերին, ինչն անթույլատրելի է, քանի որ հակամարտության լուծման միակ ձևաչափը հենց ԵԱՀԿ Մինսկի խումբն է»:
Կարդացեք նաև
Արմեն Ռուստամյանը պնդեց, որ ներկայացված զեկույցները միակողմանի են և դրանց ընդունումը պատիվ չի բերի Վեհաժողովին: Այնուհետև եզրափակեց. «Մենք ձեզ հետ միասին Ադրբեջանի Մեջլիսում չենք նստած»:
Տաթև ՀԱՐՈՒԹՅՈՒՆՅԱՆ
