«Պարոն Այվազյան, դուք արդեն լրիվ ավերում եք տնտեսական դաշտը, դուք՝ անձամբ»,- այսօր ԱԺ-ում իր ելույթում դիմելով ԱԺ տնտեսական հարցերի հանձնաժողովի նախագահ Վարդան Այվազյանին՝ ասաց ՀԱԿ խմբակցության պատգամավոր Հրանտ Բագրատյանը:
Ի պատասխան՝ Վարդան Այվազյանն էլ իր ելույթում հակադարձեց. «Սելը ճռռալու տեղը սելվորն է ճռռում: Լավ ա, էլի, դուք լինեք վարչապետ՝ ես տնտեսական դաշտը ավերե՞մ: Հետաքրքիր ա, էլի»: Նա մեղադրեց Հրանտ Բագրատյանին՝ «կամերաներ սիրելու» մեջ:
Կարդացեք նաև
Հիշեցնենք, որ պարոն Բագրատյանն ու Այվազյանը Պետտուրքի մասին կառավարության նախագծի քննարկման ժամանակ վիճել էին: Նա քննադատեց Այվազյանին, որ օրենքի մասին զեկուցում է, փոխանակ ԵՏՄ պայմանագրի այդ կետը հստակ կցի նախագծին, որով պարտավորվել ենք պետտուրք սահմանել՝ գոռում է. «Գոռալով եք հարց լուծում: Ինչի՞ պատշաճ չի մատուցված նախագիծը, ինչի՞ եք ինձ էլ դիտողություն անում, տիկի՛ն Նաղդալյան՝ տեղից խոսելու համար: Բա ես իրավունք չունե՞մ տեսնել այն կետը, որով դուք սա մտցնում եք»:
Ըստ Բագրատյանի, հիմա նախագիծ են բերել ուզում են լիցենզավորել մի բան, որը դադարել է լիցենզավորվել 1989-ի Ռիժկովի որոշումից հետո. «Մի ասեք՝ կտանք, էլի, 1000 դրամ է եղածը: Հարցը դա չի: Ինչի՞ չեք կցել օրենքի հիմնավորումը նախագծին, ո՞ւմ վրա եք մուննաթ գալիս»:
Հերմինե Նաղդալյանն էլ պատասխանեց, որ չի ընդունում որեւէ մեկի գոռալով խոսելը: Նա խորհուրդ տվեց Տնտեսական հարցերի հանձնաժողովի նիստերին մասնակցել եւ այս բոլոր հարցերը քննարկել այնտեղ՝ մինչ լիագումար նիստ հասնելը:
Հռիփսիմե ՋԵԲԵՋՅԱՆ
