Կառավարությունը «Պետտուրքի մասին» օրենքում նոր լրացում է անում՝ ԵՏՄ շրջանակներում արտաքին առեւտրի ոլորտում սահմանափակումների ենթակա ապրանքներ երրորդ երկրներից ներմուծման եւ երրորդ երկրներ արտահանման համար՝ սահմանելով բազային տուրքի չափով պետտուրք, որը համարժեք է 1000 դրամի: Էկոնոմիկայի փոխնախարար Էմիլ Տարասյանը վստահեցրեց, որ դա բխում է ԵՏՄ-ի հետ մեր պայմանագրային պարտավորություններից:
Այս նախագծի քննարկման ժամանակ ԱԺ Տնտեսական հարցերի հանձնաժողովի նախագահ Վարդան Այվազյանը վեճի բռնվեց ՀԱԿ խմբակցության պատգամավոր Հրանտ Բագրատյանի հետ: Վերջինս հարցրեց՝ խնդրում եմ նշեք ԵՏՄ-ի պայմանագրի, համաձայնագրի այն կետը, որի համապատասխան մենք պարտավորված ենք այլ երկրների հետ առեւտուր անելիս լիցենզիա տրամադրել:
Վարդան Այվազյանը պատասխանեց. «Հիմնական փաստաթուղթն է, որը վավերացրել ենք ԱԺ-ում՝ առեւտրի միասնական կանոններ: Ընդմիջմանը ազատը ժամանակ կունենաք՝ կգաք, ձեզ ցույց կտամ: Արտահանման հետ կապված ասում ա՝ եթե լիցենզիա չունես՝ պետք է լիցենզավորել: Բա ո՞նց էիք մտածում, այսինքն, ինքը որեւէ պայման չպիտի՞ դնի իմ առաջ: Միասնական մեկ տարածքում իրավունք ունես ապրանքների ազատ տեղաշարժի իրավունք, դրա համար խաղի կանոններ է սահմանում»:
Հրանտ Բագրատյանը կոշտ արձագանքեց. «Առաջարկում եմ երկար-բարակ չասեք, հարց եմ տալիս՝ հարցիս պատասխանե՛ք՝ ո՞ր պայմանագրի ո՞ր կետն է, վե՛րջ»:
Կարդացեք նաև
Այվազյանը պատասխանեց՝ «Ընդմիջման ժամանակ կբերեմ ձեզ կետն էլ պայմանագիրն էլ, այ քեզ բա՜ն, որ մի կետը, որ մի պայմանագիրը…»:
Հրանտ Բագրատյանը տեղից ռեպլիկներ արեց: Այվազյանի խոսքերով՝ «Լիցենզավորումը պահանջ ա: Մենք որ վավերացրեցինք ԵՏՄ պայմանագիրը, դա պահանջ ա»: Բագրատյանը տեղից բղավում էր՝ բեր ինձ էդ կետը ցույց տուր:
«Պարոն Բագրատյան, ընդմիջմանը ինչքան թուղթ կուզես՝ կբերեմ»: Բագրատյանը բղավում էր՝ Այվազյանը նեղվեց. «Քո մոտ էլ վարձով չեմ աշխատում վրես գոռում ես, իյա՛»:
Հռիփսիմե ՋԵԲԵՋՅԱՆ
