ՀՀ ԳԱԱ Պատմության ինստիտուտի տնօրեն Աշոտ Մելքոնյանի դիտարկմամբ՝ համաշխարհային հանրությանը, կարծես թե, քիչ-քիչ բերում ենք այն համոզման, որ Ադրբեջանի կազմում Արցախի լինելը ենթադրում է նոր 1915 թվական:
«Մեր զինվորների ու խաղաղ բնակչության նկատմամբ ադրբեջանցիների վերջին վայրագությունները ևս վկայում են, որ Արցախի հայությունը կարող է ցեղասպանության ենթարկվել»,- «Արմենպրես» լրատվական գործակալությունում այսօր լրագրողների հետ հանդիպման ժամանակ ասաց Աշոտ Մելքոնյանը:
Պատմության ինստիտուտի տնօրենը վստահ է, որ Արցախի ճանաչումն է հայության այդ հատվածի՝ ցեղասպանության չենթարկվելու երաշխիքը. «Տեսնում ենք՝ ինչպես են եվրոպական բարձր ատյաններից որոշ պատգամավորներ խոսում Արցախի անկախության մասին, տեսնում ենք՝ ինչպես են ԱՄՆ որոշ նահանգներ ճանաչում Արցախը: Վստահաբար կարող ենք ասել, որ բավականաչափ բան է փոխվում: Այդ ուղղությունը պետք է շարունակել և հասնել Արցախի անկախության ճանաչմանը»,- նշեց Ա. Մելքոնյանը:
Դառնալով ազատագրված տարածքներին՝ նա ընդգծեց, որ զիջում լինել չի կարող. «Մի թիզ հողի հանձնումը նշանակում է, որ թնդանոթները մոտենում են մեր բնակավայրերին և դրանք դարձնում խոցելի»:
Կարդացեք նաև
Ինչ վերաբերում է ադրբեջանական վայրագ գործողությունները որպես հանցագործության փաստ միջազգային դատարան ներկայացնելու դիտարկումներին՝ Պատմության ինստիտուտի Հայկական հարցի և հայոց ցեղասպանության պատմության բաժնի վարիչ Արմեն Մարուքյանը կարծում է, որ այդ գործընթացը հեշտ չէ, բայց բոլոր հնարավորությունները փակված չեն:
«Պետք է փաստահավաք աշխատանք կատարվի, հայց պատրաստվի: Միջազգային քրեական դատարանի կանոնադրության համաձայն, դատարան կարող են դիմել վերջինիս անդամ երկրները: Հայաստանն ու Ադրբեջանը դատարանի անդամ երկրներ չեն: Իհարկե, դա չի նշանակում, որ ընդհանրապես իրավունք չունենք դիմելու: Կա այլ պրակտիկա, երբ գործը դատարան կարող է ուղարկել ՄԱԿ անվտանգության խորհուրդը»,- եզրափակեց Արմեն Մարուքյանը:
Սիրանուշ ՀԱՅՐԱՊԵՏՅԱՆ
