«Մեր այցելությունները զինվորների ընտանիքներ ցույց են տալիս, որ շատերը սոցիալապես անապահով վիճակում են: Համաշխարհային բանկի տվյալներով` ՀՀ-ում աղքատությունը 76 տոկոս է: Պարզ չէ՞, որ զինվորների ընտանիքների մեծ մասն էլ անապահով է: Ուստի ակնկալել, որ բանակ գնացած զինվորների ընտանիքները պետք է ապահովված լինեն, իզուր է: Այստեղ ի՞նչ անի պաշտպանության նախարարը: Իշխանությունն այս ամենից պետք է հետեւություն անի»,-այսօր «Հայելի» մամուլի ակումբում հայտարարեց Երեւանի ավագանու «Բարեւ Երեւան» խմբակցության անդամ, կրթության փորձագետ Անահիտ Բախշյանը:
Նա վկայակոչեց հայաստանյան վիճակագրական տվյալները, որոնց համաձայն` մեր երկրում աղքատությունը 30 տոկոս է. «Պարզ է, որ այդպես չէ: Աղքատությունը ձեռնտու է իշխանություններին, որ ընտրությունների ժամանակ 5000 դրամով մարդու ձայնն առնեն»,-փոքր-ինչ բարկացած` ասաց Անահիտ Բախշյանը:
Նա նկատեց, որ երեկ ՀՀ նախագահն Արցախում փառաբանեց մեր զինվորին, ապա Անահիտ Բախշյանը հարցադրում արեց. «Այդ զինվորը պաշտպանեց մեր արժանապատվությունը, իսկ մեր իշխանությո՞ւնը երբ պետք է դառնա ամենակարգապահը եւ խելացին»:
Կարդացեք նաև
Տիկին Բախշյանը նաեւ տեղեկացրեց, որ գրավոր դիմում է հղել քաղաքապետին` առաջարկելով քառօրյա պատերազմի ընթացքում հայրենիքը պաշտպանելիս զոհված զինծառայողների ընտանիքներին բնակարան հատկացնել: Խոսքը զինծառայող Հրաչ Մուրադյանի եւ ազատամարտիկ Սարգիս Խալաֆյանի ընտանիքների մասին է, որոնք վարձով են բնակվում:
Լուիզա ՍՈՒՔԻԱՍՅԱՆ
