Կառավարությունն այսօր դարձյալ հավանություն տվեց «Հրազդան-ցեմենտ» ընկերությանը հարկային եւ պարտադիր սոցիալական ապահովագրության վճարների գծով առաջացած տույժերից ազատելու մասին» օրենքի նախագծին եւ որոշեց այն սահմանված կարգով ուղարկել Ազգային ժողով:
Հիշեցնենք, որ ապրիլի 26-ին ԱԺ քննարկմանը դրված այս նախագիծը տապալվեց, քանի որ ՀՀԿ խմբակցությունը չէր կարողացել քվորում ապահովել:
Այսօր կառավարությունում պատասխանելով Aravot.am-ի հարցին՝ եթե գործարանին արտոնություն չտան, ցեմենտի ոլորտում էլ մենաշնորհներ կլինե՞ն եւ գործարանը պարզապես կվերածվի մետաղյա ջարդոնի, ինչպես որ պնդում են որոշ ՀՀԿ-ական գործիչներ, Էկոնոմիկայի նախարար Արծվիկ Մինասյանն ասաց, որ այդ մտահոգությունն առաջինն ինքն է հայտնել:
«Այս նախաձեռնությունը բազմաթիվ խնդիրներ է լուծում, ոչ միայն մրցակցային միջավայրի ստեղծման ուղղությամբ, որ չունենանք մեկ ցեմենտ արտադրող գործարան, այլ նաեւ տնտեսական ակտիվության վրա ազդեցություն ունեցող նախաձեռնություն է, այն սոցիալական խնդիր լուծող նախաձեռնություն է եւ ի վերջո, այն Հայաստանի տնտեսական արդյունաբերական գիգանտներից մեկն է»:
Կարդացեք նաև
Մանրամասները` տեսանյութում
Այդ նախագծով նախատեսվում է «Հրազդան-ցեմենտ»-ին ազատել 2016 թվականի փետրվարի 1-ի դրությամբ հաշվարկված, բայց չվճարված հարկային եւ պարտադիր սոցիալական ապահովագրության գծով առաջացած տույժերից` 504 մլն 923.4 հազար դրամ ընդհանուր գումարի չափով:
Տնտեսությունում մենաշնորհները վերացնելու ուղղությամբ գործող օրենքների փոփոխության վերաբերյալ էլ Արծվիկ Մինասյանն ասաց, որ այո` փոփոխությունները պետք է սկսել օրենսդրությունից, վերանայել օրենքները, սակայն դրանք մեկ-երկու ամսվա խնդիր չեն. «Սա քաղաքականություն է, որը որդեգրվել է, և սահմանադրական փոփոխություններով պայմանավորված՝ այդ աշխատանքներն իրականացնում ենք: Առանձին դեպքերում ընթացքում կարվեն նաեւ միջնորդություններ, աշխատանքներ, որպեսզի հավասար մրցակցային դաշտը որքան հնարավոր է այս պահին ներկա օրենսդրությամբ ապահովենք, ապահովելու ուղղությամբ քայլեր ձեռնարկենք»:
Լուսինե ԲՈՒԴԱՂՅԱՆ