Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող ակտիվիստ Գեւորգ Սաֆարյանի գործով դատական նիստն այսօր միջադեպերով սկսվեց:
Դատական նիստին ներկաներից մեկը՝ Գեւորգ Սաֆարյանի կողմնակիցներից, դատավորի ներս մտնելու ժամանակ ոտքի չկանգնեց` այդ կերպ հայտնելով անհարգալից վերաբերմունք դատարանի նկատմամբ:
«Չեմ հարգում անարդար դատարանին»,- պատճառաբանեց նա:
Ոտքի չկանգնեց նաեւ ակտիվիստ Վարդգես Գասպարին` ասելով, թե հենց դատավոր Մնացական Մարտիրոսյանն է քաղբանտարկյալների գործը քննել եւ կատարել քաղաքական պատվեր. «Ես էլ չեմ կանգնել ոտքի, որովհետեւ չեմ հարգում դատարանին, դուք քննեցիք Շանթ Հարությունյանի եւ մյուս քաղբանտարկյալների գործերն ու անարդար որոշումներ կայացրիք»:
Կարդացեք նաև
Ակտիվիստների այս գործողություններից հետո դատական նիստն ընդմիջվեց 10 րոպեով, ինչից հետո դատարանին չհարգած քաղաքացիներին դատարանը թույլ չտվեց մասնակցել նիստին:
Վարդգես Գասպարին իր ավանդական դարձած պառկած բողոքը շարունակեց դատարանի շենքի դիմաց:
Հիշեցնենք, որ Գեւորգ Սաֆարյանին մեղադրանք է առաջադրվել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ բռնություն կատարելու համար:
Արփինե ՍԻՄՈՆՅԱՆ
Լուսանկարը՝ արխիվային: