Արաբկիր եւ Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում հունիսի 21-ին շարունակվում էր ոստիկանության բողոքի քննությունն ընդդեմ «SOS» հաղորդաշարի հաղորդավար Վիլեն Գայֆեջյանի:
Դատական նիստի ընթացքում եւս մեկ անգամ բարձրացվեց հաշտության հարցը: Ոստիկաններ Արթուր Մադաթյանի եւ Սերգեյ Զաքարյանի ներկայացուցիչ Կարեն Քալանթարյանը հայտարարեց, որ հաշտության առաջարկ չի եղել, սակայն նա չբացառեց, որ կողմերը կարող են հաշտության գալ: Նա նաեւ շեշտեց, որ ինքը նման առաքելություն չունի, բայց եթե նման առաջարկ լինի, այդ հարցի շուրջ կմտածեն:
Վիլեն Գայֆեջյանի ներկայացուցիչ Հայկուհի Հարությունյանն ասաց, որ արտահայտությունները չեն վերաբերվում ոստիկանությանը, այդ պատճառով՝ հաշտության առաջարկություն կողմը չունի: Ըստ նրա, հանգուցալուծումը կլինի այն, որ կողմը հայցից հրաժարվի: Հովհաննես Քոչարյանը պատասխանեց, որ իրենք ողջամիտ չեն համարում այն պնդումները, թե ոստիկանության պատիվն ու արժանապատվությունը պաշտպանելու հայց են ներկայացրել դատարան, այլ ոստիկանության բարի համբավի պաշտպանության հայց են ներկայացրել դատարան:
Ոստիկաններ Արթուր Մադաթյանի եւ Սերգեյ Զաքարյանի ներկայացուցիչ Կարեն Քալանթարյանը դատարանին խնդրեց պարտավորեցնել հրապարակային ներողություն խնդրել եւ վճարել փոխհատուցում նվազագույն աշխատավարձի 100-ապատիկի չափով:
Կարդացեք նաև
Ոստիկանության ներկայացուցիչ Հովհաննես Քոչարյանն ասաց, որ ոստիկանության ծառայողները նույնականացվել են համազգեստով, թեեւ անվանական նրանց ուղղված չէ, բայց հնչող երաժշտությունը, տաղավարը, կադրերի ներկայացնումը վկայում են, որ հավաքական իմաստով ասելիքը ուղղված է ամբողջ ոստիկանությանը: Նա նշեց, որ պատասխանող Վիլեն Գայֆեջյանը իր գործողություններով նսեմացրել է ոստիկանության բարի համբավը, եւ ըստ նրա, գործն ունեն կարծիքի արտահայտման, խոսքի ազատության չարաշահման հետ: Հովհաննես Քոչարյանը պահանջեց դատարանից պարտավորեցնել պատասխանողին ներողություն խնդրել ոստիկանությունից:
Հովհաննես Քոչարյանը նշեց, որ իրենց կարծիքով վիրավորական են «գ ու հենց-ընենց յոթ», «զաբորալպստման բաժին» եւ «շան տղա» արտահայտությունները, որոնք հնչեցրել է պատասխանող Վիլեն Գայֆեջյանը:
Հայկուհի Հարությունյանը դատարանին միջնորդեց հրապարակել «SOS»-ի համապատասխան տեսանյութը, դատավորը պատասխանեց, որ ապացույցների հետազոտման փուլում դատարանը կողմին նման հնարավորություն կտա:
Ամի ՉԻՉԱԿՅԱՆ
