«Ազգային անվտանգություն» կուսակցության նախագահ, ՀՀ-ում ԼՂՀ մշտական ներկայացուցչության խորհրդական խորհրդատու Գառնիկ Իսագուլյանը, հետադարձ հայացք նետելով հուլիսի 17-ի` ՊՊԾ գնդի տարածքում տեղի ունեցած զինված հարձակմանը, հայտարարեց, որ դա մեզ որևէ դրական արդյունք չտվեց:
«Նոյյան տապան» մամուլի սրահում լրագրողների հետ հանդիպմանը Գառնիկ Իսագուլյանը նշեց. «Անկախ ամեն ինչից` ով այսօր ինչ է խոսում, պետք է ընդունել շատ պարզ ճշմարտություն. հուլիսի 17-ին տեղի ունեցավ ծանր հանցագործություն. զինված խումբը հարձակվեց ՊՊԾ գնդի վրա, գրավեց գունդը, պատանդ վերցրեց ոստիկաններին, այնուհետև բժիշկներին, որի ընթացքում զոհվեցին ոստիկաններ»:
Դառնալով «Սասնա ծռեր»-ի կատարած զինված հարձակման թողած բացասական հետևանքներին` պարոն Իսագուլյանը շեշտեց. «Երեք ոստիկան զոհեր, մի քանի վիրավորներ, ՀՀ վարկանիշի անկում: Ցավոք, շատ քաղաքական գործիչների, իրավապաշտպանների, իրավաբանների, քաղաքագետների կողմից այս ընթացքում տարվեց քարոզչություն, որը բացառապես ուղղված էր ՀՀ պետականության դեմ: Փորձեցին վարկաբեկել բանակը, ոստիկանությունը, ԱԱԾ-ն և այն բոլոր ինստիտուտները, որոնց վրա հիմնված է պետականությունը»:
Պարոն Իսագուլյանը «Սասնա ծռեր»-ի անդամներին համարեց հանցագործներ ու պատմեց. «Երեք- չորս ժամ զինված խումբը թույլ չի տվել վիրավոր գնդապետին բժշկական օգնություն ցույց տալ: Նրանց, ում մենք համարում ենք «Սասնա ծռեր», շատ մեծ հանցագործներ են, որոնք վիրավոր մարդուն երեքից չորս ժամ թույլ չեն տվել բժշկական օգնություն ցուցաբերել, և գնդապետը մահացել է»:
Կարդացեք նաև
Վերլուծելով «Սասնա ծռերի» մարտավարությունը` պարոն Իսագուլյանը հայտարարեց, թե նրանց «պլան Ա-ն» այդպես էլ չհաջողեց, քանի որ ներսից վիրավորներ չեղան: Նա գրեթե համոզված է, որ «Սասնա ծռերի» գործողությունները ղեկավարվում էին դրսից:
Կրկին անդրադառնալով «Սասնա ծռերի» պահանջներին, պարոն Իսագուլյանը թերահավատորեն վերաբերվեց այն հայտարարություններին, թե «տղաներն իրենց զոհաբերում էին, որ հողերը չհանձնեն»: Այս առիթով Գառնիկ Իսագուլյանը հարց հնչեցրեց. «Լավ, դուք գնում էիք, բա էն յոթ հոգուն, որոնք զենք բռնած չկային, որպես մատաղ ո՞ւր էիք տանում: Ու հիմա հանկարծ այդ մարդկանց հերոսացնում ենք: Նրանց ծառայությունները, որ ժամանակին կատարվել են Հայաստանի համար, գնահատվել են»: Պարոն Իսագուլյանը «Սասնա ծռերին« հերոսացնողներին հորդորում է գեթ մեկ անգամ գնալ զոհված ոստիկանի տուն:
Տաթև ՀԱՐՈՒԹՅՈՒՆՅԱՆ
Լուսանկարը` «Նոյյան տապան»-ի
