«Վերջին չորս տարում Հայաստանի եւ Ստավրոպոլի միջեւ ապրանքաշրջանառությունը երեք անգամ մեծացել է եւ հիմնականում գյուղատնտեսական ապրանքների ու արդյունաբերության հաշվին, ուստի շատ կարեւոր է, որպեսզի մեկ միասնական տարածքում պետությունը կարգապահություն մտցնի»,-այսօր «Անտիկոնտրաֆակտ 2016» միջազգային համաժողովի ժամանակ ասաց Ստավրոպոլի կառավարիչ Վլադիմիր Վլադիմիրովը: Նրա խոսքերով, օրինակ` մորթեղենի ամենամեծ շուկաներից մեկը գտնվում է Ստավրոպոլում եւ նման խնդիրներ իրենց երկրամասում էլ են առաջանում:
Երկօրյա համաժողովում, որը տեղի կունենա նոյեմբերի 22-23-ը, կքննարկվեն ԵԱՏՄ տարածքում ապրանքների ապօրինի շրջանառության վերաբերյալ հարցեր:
Տնտեսական զարգացման եւ ներդրումների փոխնախարար Գարեգին Մելքոնյանի խոսքերով, կքննարկվեն մտավոր սեփականության պաշտպանության խնդիրները, ուժային կառույցների համագործակցության, տեխնիկական կանոնակարգման եւ համապատասխանության հավաստման, արտադրանքի մակնշման համակարգերի ստեղծման եւ այլ հարցեր:
Ինչպես կազմակերպիչները նշեցին, մասնավորապես ուշադրություն կդարձվի հակազդեցությանը առողջապահության, թեթեւ արդյունաբերության, սննդամթերքի, քիմիական արդյունաբերության, ներառյալ օծանելիքի եւ կոսմետիկ արտադրանքի, եւ շինանյութերի արդյունաբերության ապրանքների ապօրինի շրջանառությանը:
ՌԴ արդյունաբերության եւ առեւտրի նախարար Դենիս Մանտուրովին անհանգստացնում է այն փաստը, որ տարեցտարի կեղծ ապրանքների շրջանառությունը գնալով մեծանում է: Նրա տվյալներով, եթե 2014-ին կեղծ ապրանքների ապօրինի շրջանառությունը կազմել է 250 միլիարդ, ապա 2015-ին` 461 միլիարդ, ինչը, պարոն Մանտուրովի կարծիքով, եվրոպական մի երկրի համախառն ներքին արդյունքն է:
Կարդացեք նաև
Ըստ ՌԴ առեւտրի նախարարի, կեղծ ու ապօրինի ապրանքների շրջանառությունը մեծ վնասներ է հասցնում թե սպառողին, թե’ արտադրողներին եւ թե ազգային շահերին. «Պետք է մտածել ընդհանրապես ինչպես արգելել կեղծ ապրանքի ապօրինի շրջանառությունը, այդպիսի ապրանքների մուտքը միության տարածք: Դրանով հանդերձ պետք է փոխել նաեւ սպառողի պահվածքը, որպեսզի չգնեն այդ ապրանքները»:
Լուսինե ԲՈՒԴԱՂՅԱՆ
