Վրաստանի հարցերով փորձագետ Ջոնի Մելիքյանի մեկնաբանմամբ, հայ-վրացական հարաբերությունների համար 2017 թվականը լավ ու բարենպաստ նախադրյալներով կսկսվի:
«Վրաստանում ընտրական ցիկլը՝ խորհրդարանական ընտրություններն ավարտված են, հիմա ընտրություններ են սպասվում Հայաստանում, ինչից հետո պետք է որ նոր կառավարության ղեկավարին այցելություն լինի: Անցած տարի Վրաստանի վարչապետն այցելել է Հայաստան, այդ ժամանակ բարեկամության կամուրջ ծրագրի հիմնարկն է դրվել: Այդ նախագիծը կարեւոր է նրանով, որ գալիք երկու տարվա ընթացքում իրականանալու է, նաեւ անցած տարվանից լավ հիմք դրվեց էներգետիկ համագործակցության ոլորտում, ինչը վերաբերում է էներգոհամակարգերի միակցմանը՝ ՌԴ-Հայաստանի-Իրանի ու Վրաստանի:Պետք է որ դրական տարի լինի»,- այսօր «Հայացք» ակումբում ասաց Վրաստանի հարցերով փորձագետը:
Նրա խոսքով, անցած տարի Հայաստանից Վրաստան հանգստանալու մեկնողների թիվն աննախադեպ էր. «Հայաստանից 1 միլիոն 496.000 այցելու է գնացել Վրաստան: Մենք երկրորդ տեղում ենք, զիջում ենք Ադրբեջանին: Մեր երկու երկրները վիզային ռեժիմն են հանել Իրանի հետ, փորձում են համատեղ ծրագրեր, միասնական փաթեթներ մշակել Իրանի հետ կապված, որ իրանցիները մեկ այցելությամբ այցելեն երկու երկրներն էլ, ինչը տուրիզմի զարգացմանը կակտիվացնի»:
Արփինե ՍԻՄՈՆՅԱՆ
